12.8 C
Selfoss

Riztaður Mexíkani

Vinsælast

Halldór Áskell Stefánsson er sunnlenski matgæðingur vikunnar

Ég þakka traust frændans frá Hafnafirði. Verst þykir mér þó að sjá hvernig vegir lífs hans hafa lit sínum glatað eftir breytta búsetu. Hér áður fyrr segja menn að ekkert hafi stöðvað drenginn, en nú virðist hann ekki ráða fram úr því að sjóða núðlupakka án aðstoðar. Skrifast þetta líklega á lært hjálparleysi malbiks barna.

Því legg ég hér til rétt sem er í senn einfaldur og bragðgóður. Þessi fleytti mér í gegnum háskólanám hér áður fyrr og kveikti ástríðu á eldamennsku. Treysti ég því að frændi geti fundið sjálfstraustið á ný þrátt fyrir langa fjarveru frá pottum og pönnum.

Réttinn fékk ég frá yngri systir minni í útflutningsgjöf og hef eldað hann 2.346 sinnum síðan (nú síðast í kvöld).

Ritzaður Mexíkani

Hráefni í forrétt:

Sækja 4x carpaccio rétti í Kjötbúrið

Hráefnin í aðalréttinn:

1 pakki kjúklingabringur
Smá salt/pipar
Smá rifinn ostur
1 pakki ritzkex
Olía

Hráefni í sósu:

500 ml matreiðslurjómi
1 mexíkó ostur
Brot af nautateningi (ef þú vilt)

Allt annað:

Kartöflur
Hrísgrjón
Salat og annað grasmeti
Forréttur sóttur í Kjötbúrið – 4x carpaccio réttir

Aðferð:

Forrétturinn:

Raða forrétinum frá Kjötbúrinu á borðið – þú þarft ekkert að gera, en þú varst að kaupa heimsins besta forrétt. Til hamingju.

Kjúklingurinn:

Byrjaðu á því að setja ofninn þinn á 180° – annars fattar þú það eftir skref 6 og þarft að bíða eftir því að hann hitar sig. Við hötum að tapa tíma í eldhúsinu.

Taktu allar bringur og skerðu í tvennt til „þynningar“– þetta bæði styttir eldunartímann og sér til þess að frændi þinn fær sér ekki 2 bringur og éti þig út á gaddinn.

Maukar Ritz kexið í pokanum og hellir tætlunum í skál.

Hellir svo olíu í aðra skál.

Tekur loks hverja bringu fyrir sig, sekkur í olíu, marg sekkur og kastar í Ritzið. Setur svo vel Ritz húðaða og þynntu bringuna þína í eldfast mót og endurtekur þar til allar bringur eru komnar í mótið.

Gott er að bæta ögn af rústuðu Ritz yfir kjúklinginn í mótinu, strá allt með smá salt og pipar og setja inn í ofn á 180°

Eftir 20 mín getur verið gott að opna og strá yfir rifnum osti, leyfa honum að bráðna og taka svo kjúklinginn út.

Kartöflurnar:

Ákveddu hvort þú vilt venjulegar eða sætar kartöflur.

Skerðu kartöflurnar í þunnar sneiðar (ath. Ef sætar þá best að flysja þær þær fyrst)

Skelltu nóg af olíu á pönnu og steiktu sneiðarnar þínar á meðal háum hita.

Skelltu salt og pipar á þær. Þú þarft pottþétt meiri olíu reglulega út á þær og marg snúa þeim svo þær brenni ekki.

Mexíkó sósan:

Helltu öllum rjómanum í pott og settu á meðal háan hita.

Skerðu allan ostinn í nokkuð litla bita og hentu þeim öllum ofan í pottinn.

Hrærðu reglulega og leyfðu rjómanum að sjóða svo hún verði þykk.

Hægt að bæta smá nautakraft út í fyrir aukið bragð.

Allt annað:

Fínt að sjóða einn pakka af hrísgrónum þar sem þau eru frábær með sósunni.

Hentu í eitthvað dauð einfalt sallat eins og salatblöndu, vínber og rauðlauk.

Ég treysti því að þessi réttur færi frænda ögn nær beinu brautinni. Hann í það minnsta þarf að sýna sig á Selfossi til að sækja sér forréttinn og kannski man þá eftir rótum sínum.

Talandi um rætur þá veit ég færri með stærra Árborgarahjarta en vinur minn og nágranni hann Ingimar Helgi Finnsson. Meiri „já“ mann er erfitt að finna. Ingimar er svo mikill „já“ maður að hann er nú fastur í átta vinnum og skráir sig samt í allar tómstundir sem hann finnur. Minningartexti var einmitt ritaður um hann eftir 0% skráða mætingu síðasta vor þrátt fyrir fögur fyrirheit:

„Dagfarsprúður með einsdæmum, fimur með knöttinn þegar hann mætir. Fjarveran sterk í ár, ungur og hress en með bakstyrk á við marglyttu. Þú vilt hann við hlið þér þrátt fyrir veikleika.“

Nýjar fréttir