11.7 C
Selfoss

Hvert er hlutverk afsals?

Elín Káradóttir, 
Löggiltur fasteignasali hjá Byr fasteignasölu.

Afsal er undirritað við lokagreiðslu. Afsal er lokauppgjör fasteignakaupa sem staðfestir að kaupandinn eigi fasteignina að fullu eftir undirritun afsals.

Kaupandi eignast í raun eignina sem hann festi kaup á við kaupsamning en telst samt sem áður ekki eigandi að fullu fyrr en að afsal hefur verið undirritað og því þinglýst. Þegar kaupandi fasteignar hefur greitt seljanda alla umsamda upphæð í kaupsamningi fær hann afsal fyrir eigninni. Yfirleitt er afsal haldið um 45-60 dögum eftir afhendingu nema um annað hafi verið samið um og kemur það þá fram í kaupsamningi.

Ástæða þess að afsal er haldið nokkru síðar eftir afhendingu, er til að tryggja það að t.d. fasteignagjöld og húsfélagsgjöld séu komin á réttan aðila. Samhliða afsali er lögskilauppgjör undirritað, þar sem þessi gjöld eru gerð upp á milli kaupanda og seljanda. Skipting gjalda miðast almennt við afhendingu. Einnig er beðið með afsalsgreiðslu í þennan tíma svo kaupandi geti áttað sig á eigninni ef einhverjar athugasemdir kunna að vera við ástand hennar.

Þú þarft að vera afsalshafi til að geta selt eignina aftur og líka til að geta tekið lán á eignina þína eða endurfjármagnað lánin þín.

Nýjar fréttir