Góð aðsókn var að kynningarfundum nefndar um stofnun þjóðgarðs á miðhálendinu þar sem kynnt var starf nefndarinnar framundan. Góðar og líflegar umræður voru um verkefnið en á fundunum gafst gestum tækifæri til að kynna sér starf nefndarinnar og um leið koma á framfæri sínum sjónarmiðum varðandi þjóðgarð á miðhálendinu.
Alls var fundað á fimm stöðum víðsvegar um landið; á Hvolsvelli, Þingeyjarsveit, Hvammstanga, Egilsstöðum og Skeiða- og Gnúpverjahreppi sem eru í sveitarfélögum sem fara með skipulagshlutverk innan miðhálendisins, en í vor var kynningarfundur haldinn í Reykjavík.
Nefndin fékk góðar ábendingar á fundunum sem hún mun vinna úr í starfi sínu.
Frekari upplýsingar um vinnu nefndarinnar, s.s. fundargerðir og fundargögn auk hagnýtra upplýsinga, má finna á vef hennar, www.stjornarradid.is/midhalendid.