Dagskráin fagnar hálfrar aldar afmæli um þessar mundir og er það ánægjulegt að héraðsfréttablað okkar Sunnlendinga hafi haldið velli þó að áreiti vefmiðla hafi aukist mikið nú síðustu ár.

Á mínu bernskuheimili var mikið lesið og voru foreldrar mínir áskrifendur að dagblöðum og dönskum tímaritum. En tímarnir breytast og er ég ekki með nein blöð í áskrift í dag. Það er því gaman að fá Dagskrána inn um bréfalúguna einu sinni í viku og er það fastur liður að fletta í gegnum blaðið og leita eftir skemmtilegum myndum og áhugaverðum fréttum úr héraði. Bóndinn á heimilinu byrjar alltaf á að skoða uppskriftir hjá Sunnlenska matgæðingnum og hafa margir réttir verið prófaðir í eldhúsinu á okkar heimili.

Ég hef átt góð samskipti við ritstjóra Dagskrárinnar í gegnum árin í tengslum við starf mitt hjá Hveragerðisbæ. Það er mikilvægt fyrir sveitarfélögin að fá góða umfjöllun um málefni líðandi stundar og geta birt tilkynningar, fréttir, myndir af viðburðum og fleira í prentmiðli. Dagskráin hefur sinnt því með sóma.

Það er von mín að Dagskráin muni áfram sinna hlutverki sínu sem frétta og upplýsingamiðill í héraðinu og muni eflast enn meira á komandi árum.

Jóhanna M. Hjartardóttir, menningar og frístundafulltrúi Hveragerðisbæjar