Hljómsveitin SLYSH hefur sent frá sér nýtt lag, Sing With Me, sem markar upphafið að nýjum kafla hjá sveitinni. Lögin á plötunni eru flest tilbúin og verða gefin út eitt af öðru áður en platan kemur síðar út í heild sinni.
Hljómsveitina skipa þeir Björgvin Svan Mánason sem spilar á gítar og er bakrödd, Gísli Freyr Sigurðsson sem er aðalsöngvari, Eyvindur Sveinn Lárusson spilar á rafmagnsgítar, Hrafnkell Örn Blöndal Barkarsson er á hljómborðinu, Stefán Gunngeir Stefánsson er trommari og Úlfur Þórhallsson spilar á bassa.
„Ég samdi textann þegar ég var að vinna mig í gegnum ástarsorg. Ég var á stað þar sem alls konar smáatriði kölluðu fram minningar. Lykt, veður, lög og eiginlega hvað sem er. Sing With Me varð leið fyrir mig til að koma þessum tilfinningum út úr höfðinu og niður á blað. Kannski líka til að segja eitthvað sem ég hafði ekki alveg náð að segja.“ segir Gísli söngvari sveitarinnar.
Björgvin gítarleikari, hafði lúrað á hugmyndinni að laginu í einhvern tíma. Þegar hann og Gísli fóru að vinna áfram með lagið fór Sing With Me að taka á sig mynd og á æfingum mótaði svo sveitin lagið áfram í sameiningu.
Lagið var tekið upp í Stúdíó Sundlauginni undir stjórn Alberts Finnbogasonar. SLYSH fékk upptökutímana í verðlaun eftir sigur í hljómsveitarkeppninni Allra Veðra Von í Vestmannaeyjum árið 2024.
Það var unnið af krafti í upptökunum, en heimagerða pylsupastað hélt mannskapnum gangandi þegar hlé gafst.
Sing With Me er komið út og er fyrsta lagið af nýju efni frá SLYSH. Tónlistarmyndband við lagið kemur út næstkomandi föstudag.
Instagram: slysh.official
Facebook: SLYSH
TikTok: slysh.official
YouTube: SLYSH
