Nýr meirihluti Sjálfstæðisflokksins í Árborg hefur tekið formlega til starfa í kjölfar fyrsta bæjarstjórnarfundar sem fór fram 3. júní sl. Leiðarljós Sjálfstæðisflokksins í Árborg er að auka hagsæld sveitarfélagsins, byggja upp öflugt atvinnulíf og létta undir og bæta daglegt líf okkar íbúa.
Bragi Bjarnason verður áfram bæjarstjóri
Embættisskipan verður á þann veg að Bragi Bjarnason heldur áfram sem bæjarstjóri næsta kjörtímabil. Sveinn Ægir Birgisson verður formaður bæjarráðs og Kjartan Björnsson, forseti bæjarstjórnar.
Formenn helstu fagnefnda sveitarfélagsins verða:
- Linda Björk Hilmarsdóttir, formaður skipulagsnefndar og velferðarnefndar
- Sveinn Ægir Birgisson, formaður eigna- og veitunefndar
- Brynhildur Jónsdóttir, formaður fræðslu- og frístundanefndar
- Þórhildur Ingvadóttir, formaður umhverfisnefndar og öldungaráðs
- Kjartan Björnsson, formaður nýrrar menningarnefndar sem verður skipuð á næsta fundi bæjarstjórnar
„Við erum þakklát íbúum fyrir traustið og munum starfa áfram að heilindum fyrir alla íbúa í Sveitarfélaginu Árborg. Höfum trú á góðri samvinnu innan bæjarstjórnar að þeim tækifærum sem eru fyrir Árborg á næstu árum. Saman náum við betri árangri.“
Mikil tækifæri í Árborg til framtíðar
Skýr framtíðarsýn er forsenda þess að sveitarfélagið megi vaxa og dafna. Sjálfstæðisflokkurinn mun vinna að því að létta róðurinn og tryggja ábyrga fjármálastjórn sem skili sér í lægri álögum á íbúa og fyrirtæki. Stefnan er að byggja upp fjölbreytt atvinnulíf og sterka innviði í fjölskylduvænu samfélagi þar sem íbúar á öllum aldri geta sótt þjónustu og fengið störf við hæfi. Þá ætlum við að standa fyrir uppbyggingu útivistar- og frístundasvæða sem munu bæta lífsgæði okkar íbúa til lengri tíma.
Bæjarstjóri ásamt öðrum bæjarfulltrúum D-listans munu vinna þétt saman með öðrum bæjarfulltrúum að þeim verkefnum og tækifærum sem eru framundan í sveitarfélaginu. Saman munum við ná betri árangri fyrir Árborg okkar allra.
Bragi Bjarnason
Sveinn Ægir Birgisson
Linda Björk Hilmarsdóttir
Brynhildur Jónsdóttir
Þórhildur Dröfn Ingvadóttir
Kjartan Björnsson
