Í aðsendri grein á dfs.is fer bæjarstjórinn í Árborg og oddviti D-listans enn og aftur í það leiða far sitt í að reyna að villa um fyrir og blekkja bæjarbúa með því að telja þeim trú um það að kjörtímabilið 2018-2022 hafi sveitarfélagið verið rekið með 7,8 milljón króna tapi á dag.
Þar að auki er þessum rangfærslum skellt fram án þess að setja tímabilið í samhengi við fádæma fjárfestingar í innviðum Árborgar með tilheyrandi eignaaukningu, eftir áralanga vanrækslu Sjálfstæðisflokksins á öllum sviðum innviða sveitarfélagsins.
Lítum á staðreyndir mála.
Á grafinu hér fyrir neðan má sjá hvernig þróunin heildareigna og heildarskulda var á umræddu tímabili ásamt áætlaðri þróun fram til 2029, en á því sést greinilega að eignir jukust um nánast sömu upphæð og skuldirnar eða um 15 – 16 milljarða.
Ólíkt því sem bæjarstjórinn og bæjarfulltrúar Sjálfstæðisflokksins hafa haldið fram þá urðu þessar auknu skuldir ekki til vegna óráðsíu fyrri meirihluta í rekstri sveitarfélagsins heldur vegna innviðauppbyggingar, annars vegar vegna fádæma fólksfjölgunar og hins vegar vegna trassaskapar D-listans við uppbyggingu þeirra: Uppbyggingar á leikskólum, grunnskólum, veitukerfi, íþróttamannvirkjum, gatnakerfi o.s.frv.
Eignir aukast umfram langtímaskuldir
Almenn skilgreining reikningsskila bókhalds er sú að þarna ræðir um fjárfestingu í eignum en ekki rekstrargjöld: Sem sagt fjárfestingar í samfélagslegum innviðum til langrar framtíðar og til að vinna upp vanrækslu Sjálfstæðisflokksins frá fyrri tíð.
Kannski lítur bæjarstjóri Árborgar svo á að fjárfesting í samfélagslegum innviðum sé rekstrartap og ef svo er ætti hann að hugsa alvarlega sinn gang. Staðreyndin er sú að á umræddu kjörtímabili jukust eignir umfram skuldir þrátt fyrir hina miklu innviðauppbyggingu sem þáverandi meirihluti stóð að og á sér varla samjöfnuð.
Þegar tölurnar eru brotnar enn meira niður má sjá að eignir aukast nokkuð umfram aukningu langtímaskulda en þær eru nær eingöngu tilkomnar vegna fjárfestinga í innviðauppbygginu sveitarfélagsins en einnig vegna hækkandi verðbólgu í kjölfar Covid-19 sem hafði bein áhrif á hækkun langtímaskulda, þ.s. langtímaskuldir sveitarfélagsins eru nær allar verðtryggðar. Þetta þekkja allir sem eru með verðtryggð húsnæðislán og horfðu upp á sömu þróun á hækkun höfuðstóla lána sinna, ásamt hærri vöxtum og hærri afborgunum í kjölfarið.
Ekki ætla ég að halda því fram að ekki hefði verið hægt að gera eitthvað betur í rekstri sveitarfélagsins 2018–2022, vitaskuld er svo en rétt skal vera rétt. Nú er lag að blekkingarleik Braga bæjarstjóra og félaga í meirihlutanum linni og þau standi skil á eigin verkum, sem svo mildilega sé mælt, orka mörg hver afar tvímælis. Það er efni í næstu grein mína þar sem ég mun meðal annars fjalla um óþarft Íslandsmet Sjálfstæðisflokksins í Árborg í skattahækkunum.
Sigurjón Vídalín Guðmundsson,
oddviti lista Samfylkingarinnar og óháðra í Árborg.
