Guðbjörg Björgvinsdóttir er sunnlenski matgæðingur vikunnar.
Ég þakka þér Maja mín kærlega fyrir áskorunina.
Eins og gefur að skilja hafa matarhefðir mínar, eins og flestra annara breyst mikið frá því í upphafi ferilsins sem er orðinn nokkuð langur.
Það var gaman að elda, vanda sig og gleðja fjölskylduna með góðum mat en nú eru fuglarnir flognir úr hreiðrinu. Í dag finnst okkur hjónunum gaman að gleðjast yfir góðum mat með góðum vinum og ég kýs að hafa hann einfaldan án mikillar fyrirhafnar.
Dæmi um matarboð:
Forréttur
Klettasalat borið fram í nokkuð víðri skál eða fati.
Tvíreykt hangikjöt þunnt sneitt blandað í salatið.
Köld piparsósa.
Aðalréttur
Ofnbakaður lax (helst villtur).
Laxaflökin lögð í smurt eldfast mót. Skorið í flökin með ca.4 cm millibili til hálfs niður í fiskinn. Dala-fetaostur í kryddolíu eða gullostur stappaður og honum smurt niður í skurðarraufarnar, kryddað með salti og pipar, möndlukurli stráð yfir flökin, að lokum er safa úr hálfri til einni sítrónu dreift yfir fiskinn. Sett inn í 180-190 stiga heitan ofn. Eldunartími fer eftir þykkt flakanna.
Uppskerutíminn er í fullum gangi og því eru gullauga kartöflur með hýðinu og bráðið smjör ásamt brakandi fersku grænmeti af ýmsum gerðum ómissandi á diskinn.
Eftirréttur.
Slatti af íslenskum bláberjum,sett í glas á fæti.
Slatti af grískri jógúrt látin yfir.
Að síðustu hlynsýróp eftir smekk.
Ekki gleyma kertaljósi á borðið.
Að lokum vil ég tilnefna tengdadóttur mína Ingu Rún Björnsdóttur sem næsta matgæðing.
Hún er snillingur á mörgum sviðum þ.á.m. í matargerð.
