Framkvæmdir við byggingu íbúða fyrir fólk 50 ára og eldra að Austurvegi 39–41 á Selfossi eru langt á veg komnar. Í fyrsta verkhlutanum voru 12 íbúðir, í miðáfanganum 9 íbúðir og í þeim síðasta 16 íbúðir. Samtals eru þetta 37 íbúðir.
Að sögn Pálma Pálssonar, hjá byggingaraðilanum Pálmatré ehf., er nú þegar búið að selja nær allar íbúðirnar og eru íbúar fluttir í um helming þeirra. Salan gekk það vel að lítið þurfti að auglýsa þær. Íbúðirnar eru frá 86 m² upp í 100 m² auk geymslu. Þær eru allar þriggja herbergja þ.e. með stofu og tveimur herbergjum. Íbúar gátu valið innréttingar, hurðir og gólfefni. Verðið er frá 36 milljónum upp í rúmar 46 milljónir. Undir mið og síðasta áfanganum er bílakjallari. Húsið er klætt með áli og timbri og gert eins viðhaldslítið og hægt er. Áætlað er að afhenda síðustu íbúðirnar í þriðja áfanganum í október og ljúka verkinu í haust.
