Ilmandi blómin og hlýr sumarandvarinn lék um Hveragerðisbæ nú undir kvöld. Hvergerðingar hafa lagt sitt af mörkum til að gera bæinn sem fallegastan. Gríðarfallegar skreytingar má finna víðsvegar um bæinn. Í tilefni af viðburðinum, Blóm í bæ, eru í Hveragerði 30 faglærðir blómaskreytar úr ýmsum áttum. Þeir hafa unnið hörðum höndum að hönnun skreytinga úr íslenskum blómum sem prýða aðalgötu bæjarins og Lystigarðinn.
Bæjarstjórinn með hrífu í hönd
Það var kunnulegt andlit sem stóð á kafi í miðju blómabeði við Lystigarðinn í Hveragerði. Aldís Hafsteinsdóttir var ásamt fríðu föruneyti sjálfboðaliða á fullu að leggja lokahönd á snyrtingu bæjarins en óhætt er að segja að bærinn skarti sínu fegursta fyrir hátíðina og hvergi að finna vömm á. Aðspurð sagði Aldís eiga von á miklum fjölda fólks því veðrið verði með besta móti.
Fjölbreytt dagskrá framundan
Það verður mikið um að vera á hátíðinni en dagskrána má finna hér. Meðal þess sem finna má er spennandi markaður í gróðurhúsinu EDEN í Þelamörkinni. Þegar blaðamann bar að garði voru kynningaraðilar í óðaönn að koma fyrir varningi sínum. Þar verður m.a. fjölbreytt sala og sýning á pottablómum, afurðir úr græna geiranum og vörur beint frá býli.
Óhætt er að mæla með því að gera sér ferð í Hveragerði þó ekki sé nema til að líta á fallegar blómaskreytingarnar sem prýða bæinn hvert sem litið er.
