Sala á íbúðum við Austurveg 51 á Selfossi hefur gengið mjög vel. Íbúðirnar sem eru frá 88 fermetrum upp í 137 fermetra, eru ætlaðar fólki 55 ára og eldra. Þær eru með vönduðum innréttingum, svalalokun, bílastæði í upphitaðri bílageymslu, mynddyrasíma og hleðslueiningu í hverju bílastæði. Alls voru byggðar 28 íbúðir með upphituðum bílakjallara í þessum áfanga.
Að sögn Guðmundar Sigurðssonar, eins af framkvæmdaaðilum, eru nú þegar 24 íbúðir seldar. „Það er augljóst að svona íbúðir hefur vantað á markaðinn hér á Selfossi. Margir hafa selt einbýlishús sín og keypt hér íbúðir,“ segir Guðmundur.
Í vor verður byrjað á áfanga tvö en í honum verða 26 íbúðir. Á myndinni hér að ofan, til vinstri, má einnig sjá tengibyggingu við Grænumörk en í henni er félagsaðstaða og dagvist fyrir eldri borgara á Selfossi. Hún er á tveimur hæðum, samtals um 900 fermetrar.
