Um þessar mundir standa yfir miklar framkvæmdir við gamla kaupfélagshúsið við Austurveg á Hvolsvelli. Sveitarfélagið Rangárþing eystra, sem stendur að framkvæmdunum ásamt verktakanum Jáverki, keypti húsið og yfirráð að landi miðbæjarins af Reitum ehf. fyrir nokkrum árum.
Í húsnæðinu, sem nú er lokað vegna framkvæmdanna, verður ný lágvöruverðsverslun Krónunnar og er stefnt að því að opna hana fyrir páska. Á efri hæðinni verður ráðhús sem rúmar alla skrifstofustarfsemi sveitarfélagsins. Einnig verða þar ýmsar skrifstofur og þjónustufyrirtæki og er húsnæðið nánast uppselt. Enn er laust um 50 m² húsnæði á fyrstu hæð sem gefur möguleika á margþættari starfsemi. Heildarrýmið er rúmlega 2500 m².
Að fá lágvöruverðsverslun á Hvolsvöll er gamalt baráttumál íbúa héraðsins og hefur án efa mikil efnahagsleg áhrif fyrir alla, heimamenn jafnt sem ferðamenn sem hafa verið ört vaxandi hópur undanfarin misseri.
