Unglingadeildin heldur vikulega fundi með fræðslu um starf björgunarsveita, þar sem m.a. er kennd skyndihjálp og unnið með hvetjandi hópefli.
Krakkarnir, sem eru á aldrinum 13–17 ára, eru virkilega spenntir fyrir sundinu og ætla öll að gera sitt besta til að ná markmiðinu.
Markmiðið er að safna fyrir flotgöllum í unglingastærð sem nýtast til æfinga fyrir ungmennin og einnig fyrir félagsmenn við björgun í vatni. „Okkur finnst skemmtilegast að æfa í ánni björgun í vatni og langar okkur í flotgalla sem passa á okkur til þess,“ segja krakkarnir kampakát.
Stefnan er að synda lengd Laugarvegarins eða 55 kílómetra á 12 klukkustundum. Krakkarnir eru mjög jákvæðir fyrir því að þau nái þessu markmiði og eru mjög spenntir fyrir því.
„Gestum er velkomið að koma að styðja okkur og synda með okkur á opnunartíma sundlaugarinnar, á milli kl. 19:00 og 21:00!” segja krakkarnir spennt.
Allar upplýsingar um sundið sem og styrktarupplýsingar eru inni á Facebook-síðu Flugbjörgunarsveitarinnar á Hellu. Ef fólk vill fylgjast með sundinu verður sýnt frá því á Instagram-síðu deildarinnar @unglingadeildin_hellingar.
