Á síðasta fundi bæjarráðs lögðu allir fulltrúar, meirihluti og minnihluti, fram sameiginlega bókun um árshlutauppgjör Hveragerðisbæjar. Þar var tekin fagleg afstaða: Við horfumst í augu við að tekjur af lóðasölu hafa dregist saman, viðurkennum að bregðast þarf við erfiðri lausafjárstöðu og forgangsröðum í þágu grunnþjónustu og nauðsynlegra framkvæmda eins og íþróttahússins.
Það veldur vonbrigðum að forystufólk meirihlutans kjósi að hlaupa í fjölmiðla fáeinum dögum síðar með upphrópanir um að „áætlanir greiði ekki reikninga“. Skotgrafahernaður leysir engan vanda.
Samfella í stað kyrrstöðu
Á síðasta kjörtímabili urðu veruleg stakkaskipti í rekstri bæjarins. Jafnvægi náðist í rekstrinum og afkoman fór úr 300 milljóna króna tapi árið 2021 í 100 til 170 milljóna króna rekstrarafgang árin 2024 og 2025. Heilbrigðismerki rekstrarins styrktust til muna, samhliða umfangsmikilli uppbyggingu innviða og þjónustu.
Í aðdraganda kosninga lögðum við í Okkar Hveragerði mikla áherslu á að tryggja samfellu í verkefnum bæjarins. Bæjarfélagið má ekki fara í frost við stjórnarskipti – hvorki í sókn nýrra tækifæra né framvindu yfirstandandi verkefna.
Ef nýr meirihluti setur tilbúin verkefni á ís og fylgir málum ekki eftir, stöðvast eðlilegt tekjustreymi. Áætlanir skila engu ef framkvæmdir og samningaviðræður um tekjuaflandi verkefni stoppa.
Tölurnar tala sínu máli
Það er mikilvægt að halda staðreyndum til haga:
- Bæjarbúar greiða sína reikninga: Útsvarstekjur bæjarins á fyrstu fimm mánuðum ársins eru 119 milljónum króna hærri en áætlun gerði ráð fyrir og Aðalsjóður skilar 106 milljóna króna rekstrarafgangi fyrir fjármagnsliði. Grunnreksturinn stendur fyllilega undir sér.
- Hvar liggur vandinn? Lausafjárskorturinn stafar af því að áætlaðar tekjur af gatnagerðar-, byggingarréttar- og innviðagjöldum hafa einungis skilað sér að litlum hluta, þar sem lóðum hefur ekki verið úthlutað og samningar um stærri uppbyggingarverkefni ekki verið kláraðir.
- Lántaka er ekki tekjuöflun: Tillaga meirihlutans um að taka 600 milljóna króna langtímalán er tímabundið neyðarúrræði til að létta á yfirdrætti og klára íþróttahúsið. En lán eru ekki nýjar tekjur – þau þarf að greiða til baka með vöxtum.
Leiðin fram á við
Áætlanir greiða vissulega ekki reikninga – en aðgerðaleysi og nýjar lántökur gera það enn síður.
Ef bærinn á að standa undir skuldbindingum sínum án þess að skera niður í þjónustu við íbúa verður meirihlutinn að sýna forystu í verki.
- Klára þarf lóðamál í Kambalandi svo hægt sé að úthluta lóðum og innheimta gjöld, enda hefur bærinn þegar fjárfest í nauðsynlegri gatnagerð á svæðinu.
- Klára þarf samninga á Grundarreit og öðrum uppbyggingarreitum sem voru á lokametrunum við stjórnarskipti, en meirihlutinn hefur ekki siglt í höfn. Þessi verkefni ein og sér skila bænum hundruðum milljóna í tekjur.
Við í Okkar Hveragerði munum áfram veita málefnalegt aðhald, styðja skynsamlegar lausnir en krefjast þess að meirihlutinn snúi sér að raunverulegri verðmætasköpun í stað þess að kenna öðrum um eigin biðstöðu.
Lárus Jónsson og Dagný Sif Sigurbjörnsdóttir, bæjarfulltrúar Okkar Hveragerðis
