100 ára afmæli Reykholts í Bláskógabyggð verður fagnað 20. maí 2026. Í tilefni tímamótanna hafa verið gerð fræðsluskilti um sögu þorpsins og efnt verður til hátíðar í Reykholti á afmælisdaginn 20. maí. Hátíðardagskrá hefst kl. 16:00 á horninu þar sem Skólabraut/Sólbraut mætast. Söguskiltin verða afhjúpuð þar formlega og síðan boðið upp á afmælis- sögugöngu með leiðsögn og fróðleik um Reykholt, gengið upp að Reykholtshver, Reykholtsskóla og Aratungu. Við lok göngunnar verður boðið upp á veitingar í Aratungu.
Öll hjartanlega velkomin.
Upphaf byggðar í Reykholti má rekja til þess að 20. maí 1926 gaf vinnumaðurinn Jón Halldórsson Biskupstungnahreppi land og fé fyrir barnaskóla sem byggður skyldi við Reykholtshver í landi Stóra-Fljóts. Engir mannabústaðir voru þá í Reykholtinu en bærinn á Stóra-Fljóti stóð í hæðinni rétt ofan við bæjarhúsin á Brautarhóli.
Nú eru hundrað ár liðin frá þessum gjafagjörningi og við minnumst upphafsins og þeirra sem ruddu brautina, hófu garðyrkju og búskap í Reykholti, beisluðu Reykholtshver, lögðu vegi og lagnir um svæðið. Fyrstu býlin voru byggð 1929-1952. Hér myndaðist fljótlega gott mannlíf og margir öflugir frumherjar komu að uppbyggingunni.
Reykholt hefur vaxið hratt undanfarin ár og þar blómstar mannlíf og menning. Í dag eru íbúar tæplega 500 talsins og sannkallað fjölmenningarsamfélag. Reykholt er öflugasta ylræktarsvæði landsins, þar sem heita vatnið er svo sannarlega lífæð samfélagsins.
Stórar garðyrkjustöðvar einkenna Reykholt, þær sérhæfa sig hver og ein í ræktun á ákveðnum tegundum og eru fjórar þeirra stærstar á sínu sviði á landsvísu. Friðheimar stærsta tómataræktunarstöðin, Espiflöt stærst í ræktun afskorinna blóma, Gufuhlíð stærst í gúrkuræktun, Jarðaberjaland stærst í framleiðslu jarðarberja og Kvistabær er stærsti skógarplöntuframleiðandi á Suðurlandi. Reykholt er ört vaxandi þorp og öflugasta ylræktarsvæði á landinu, þar sem heita vatnið er svo sannarlega lífæð samfélagsins.
