Nú á dögunum héldum við í Krakkaborg hina árlegu uppskeruhátíð okkar, sem hefur á undanförnum árum orðið kærkomin hefð í leikskólanum. Hátíðin markar haustið á skemmtilegan hátt og gefur okkur tækifæri til að staldra við, njóta afraksturs ræktunarinnar og fagna öllu því sem nemendur og kennarar hafa skapað saman.
Veðrið var reyndar ekki alveg að vinna með okkur í ár og því færðum við hátíðina inn fyrir dyr. Það kom þó lítið að sök og skapaðist hlý og lífleg stemning í Krakkaborg þegar foreldrar og aðrir gestir komu saman með okkur.
Á borðum mátti finna fjölbreyttar kræsingar sem nemendur og kennarar höfðu útbúið saman. Þar voru meðal annars sultur af ýmsum gerðum, heimagert smjör, ferskt salat, gulrætur úr ræktuninni okkar og svalandi safi. Það er alltaf eitthvað sérstaklega skemmtilegt við að bera á borð matvæli sem nemendur hafa sjálfir tekið þátt í að rækta, uppskera og útbúa – frá mold og fræi yfir í tilbúna afurð.
Uppskeruhátíðin endurspeglar vel áherslur Krakkaborgar á sjálfbærni, útiveru, ræktun og heilbrigði. Í ræktunarstarfinu fá nemendur að fylgjast með hringrás náttúrunnar, sjá hvaðan maturinn kemur og upplifa hversu mikla umhyggju, tíma og þolinmæði þarf til að rækta matvæli. Þau læra jafnframt að bera virðingu fyrir náttúrunni, nýta það sem hún gefur okkur og fara vel með þær auðlindir sem við höfum.
Þetta er nám sem verður til í gegnum raunverulega reynslu – með því að sá, vökva, fylgjast með, uppskera, smakka og skapa. Þar mætast einmitt hugur, hjarta og hönd; forvitnin og þekkingin, gleðin yfir því að skapa saman og hendurnar sem fá að framkvæma.
Í ár ákváðum við að bæta enn meiri samveru við hátíðina og buðum foreldrum að setjast niður með nemendum og búa til sína eigin trékalla. Leikskólinn útvegaði ýmiss konar greinar, garnspotta, lím, fönduraugu og fleira skemmtilegt. Hugmyndaflugið fékk heldur betur að njóta sín og til urðu trékallar af öllum stærðum og gerðum. Ekki síður dýrmæt var samveran sjálf – að foreldrar og nemendur gætu sest niður, skapað eitthvað saman, spjallað og notið stundarinnar.
Uppskeruhátíðin okkar snýst því um miklu meira en það sem endar á veisluborðinu. Hún snýst um tengslin við náttúruna, gleðina sem fylgir því að skapa með eigin höndum og mikilvægi þess að eiga góðar stundir saman.
Við þökkum öllum þeim sem komu og áttu þessa notalegu stund með okkur. Uppskeran í ár var nefnilega ekki bara úr beðunum okkar – hún fólst líka í gleði, sköpun, samveru og góðum minningum.
Sara Guðjónsdóttir, leikskólastjóri
