Matgæðingur vikunnar er Sævar Birnir Steinarsson.
Takk Stína fyrir að skora á mig sem næsta matgæðing vikunnar og vona að ég eigi ekki eftir að verða þér til skammar.
Þegar ég elda heima er ég yfirleitt með allt í pönnum og plöttum og reyni að hafa frekar rustic og einfalt.
Ég tók mjög einfalda sunnudagsmáltíð sem slær alltaf í gegn á mínu heimili.
Glazaðir lambaskankar í rauðvínssoðsósu með pikkluðum sinnepsfræjum og ferskum kryddjurtum og kartöflumús.
Lambaskankar í rauðvínssósu:
Lambaskankar
1 dolla rauðsvínssósa frá kjötbúrinu
Vatn svo hylji yfir skanka
Salt og svartur pipar
4 stk. Stjörnuanís
1 stk. laukur
4 stk. gulrætur
1/2 selleríbúnt
1 lítil dós tómatpúrra
1/2 flaska rauðvín
Sveppakraftur eftir smekk
Truffluolía eftir smekk
100 g smjör
Steinselja
Estragon
Aðferð:
Skankarnir brúnaðir á pönnu og kryddaðir með salti og pipar og settir í ofnpott, sellerí, laukur og gulrætur svitaðar á sömu pönnu og tómatpúrru bætt við. Þegar tómatpúrran er aðeins byrjuð að brenna er rauðvíni bætt við og soðið niður og þá vatni bætt við. Öllu gumsinu hellt yfir skankana þannig að vökvinn og grænmetið fljóti yfir skankana ásamt stjörnuanís og eldað á 100 gráðum í 4 tíma eða þangað til að lambaskankarnir eru orðnir mjúkir alveg í gegn.
Skankarnir því næst veiddir upp úr soðinu og látnir kólna (gott er að gera þetta deginum áður og láta þá kólna í soðinu).
Soðið sigtað í pott og soðið niður þangað til komið er kröftugt bragð í það og þá er bætt við rauðvínssósunni frá Kjötbúrinu og smakkað til með salti, pipar, sveppakrafti og truffluolíu. Má þykkja með maizena eða hveiti ef fólk vill og bæta svo við köldu smjöri rólega í endann.
Skankarnir eru settir uppréttir á pönnu og bakaðir í 210 gráðu heitum ofni í 10 mínútur. Þá er hluta af sósunni hellt yfir skankana og þeir bakaðir í 10 mínútur í viðbót á 160 gráðum. Þá verða þeir stický og flottir.
Kryddjurtirnar saxaðar og settar yfir skankana ásamt sinnepsfræjunum.
Pikluð sinnepsfræ
50 g gul sinnepsfræ
100 ml vatn
100 ml eplaedik
Öllu blandað saman og soðið rólega í 20 mín og látið kólna yfir nótt.
Kartöflumús
1 kg bökunarkartöflur
200 g smjör
100 ml rjómi
Parmesan eftir smekk
Salt og pipar
Bökunarkartöflur soðnar í potti þangað til þær eru mjúkar í gegn. Smjör og rjómi brætt saman og hellt yfir kartöflurnar. Parmesanosti bætt við og stappað vel saman eða hrært í hrærivél. Ég kýs að hafa hýðið með í músinni ef það er smekksatriði.
Ferskt rauðkál með eplum og döðlum
1 haus rauðkál
2 stk. græn epli
1 poki döðlur
40 g ferskt dill og steinselja
3 msk. balsamic síróp
1/2 dl eplasafi
1/2 dl sítrónusafi
4 msk. extra virgin ólífuolía
Rauðkál rifið eða skorið fínt og græn epli skorin í teninga. Döðlur saxaðar ásamt kryddjurtum, salti og pipar. Þessu blandað vel saman og balsamic sírópi, eplasafa, sítrónusafa og olíu.
Þegar maður neglir í skankapartí verður maður að hafa einhvern góðan eftirrétt tilbúinn þegar það byrjar að opnast magapláss hjá gestum. Þá er skothelt að vera með eina nýbakaða eplaköku og vanilluís með kaffinu.
Eplakaka:
2 egg
200 g sykur
100 g smjör
200 g hveiti
1 tsk. lyftiduft
1 msk. vanilludropar
Jarðarberjasulta
3 stk. græn epli
5 msk. kanilsykur
Aðferð:
Egg og sykur þeytt saman þangað til sykurinn er leystur upp og þá bræddu smjöri bætt rólega við. Þurrefni sigtuð við og hrært við þangað til vel blandað saman. Þá er deigið sett í kökuform og sultan sett ofan á deigið, epli skorin í fallega báta og kanilsykri blandað við. Eplum raðað ofan á kökuna og kakan bökuð á 180 gráðum í forhituðum ofni í 35 mín eða þar til hún er elduð í gegn.
Borið fram með rjóma eða vanilluís eða bæði.
Fullkomin sunnudagsmáltíð og góður endir eða byrjun á næstu viku.
Mig langar til þess að skora á Baldur „Ghost tow“ Kristinsson sem er nýlega fluttur aftur í nafla alheimsins. Ég veit að hann lumar á einhverjum svakalegum uppskriftum fyrir Sunnlendinga.
