180 ára afmæli Búrfellskirkju var fagnað með hátíðlegri guðsþjónustu 10. ágúst síðastliðinn. Sr. Kristín Þórunn Tómasdóttir, sóknarprestur, prédikaði og þjónaði við athöfnina á meðan Matthías Harðarson dómorganisti stýrði safnaðarsöng. Sturla Jónsson gegndi hlutverki hringjara og Sigurður Böðvarsson var meðhjálpari. Elísa Schram og Anna Ýr fluttu ritningarlestra og Laufey Böðvarsdóttir kynnti í stuttu máli sögu kirkjunnar.
Fjóla Steindóra Kristinsdóttir, sveitarstjóri Grímsnes- og Grafningshrepps, flutti ávarp fyrir hönd sveitarstjórnar og afhenti kirkjunni gjöf – glæsilegan garðbekk úr graníti frá Steinsmiðju Akureyrar. Bekkurinn er tákn um styrk, festu og samveru, þau gildi sem kirkjan hefur staðið fyrir í gegnum tíðina. Með gjöfinni vill sveitarstjórnin leggja sitt af mörkum til að styrkja kirkjuna sem samkomustað íbúa, jafnt í gleði sem sorg.
Að guðsþjónustu lokinni bauð Lísa Thomsen kirkjubóndi til kaffisamsætis að Búrfelli. Velunnarar kirkjunnar voru hvattir til að mæta og fagna þessum merka tímamótum, sem heppnuðust afar vel.
