Katrín Jakobsdóttir, forsetaframbjóðandi, býður til funda á Suðurlandi 21. til 23. apríl. Katrín verður fyrst á ferð um Árnessýslu ásamt Gunnari Sigvaldssyni, eiginmanni sínum, sunnudaginn 21. apríl. Fyrsti áfangastaður er Þingvellir þar sem Katrín og Gunnar kynna sér starfsemi þjóðgarðsins. Næst er ferðinni heitið að Laugarvatni, þar sem heilsað verður upp á heimamenn. Því næst munu þau halda opna fundi á eftirtöldum stöðum:
Kl. 13 hefst opinn fundur á kaffihúsinu Grænu könnunni á Sólheimum í Grímsnesi. Kl. 15 verður opinn fundur í Risinu í Mjólkurbúi Flóamanna í nýja miðbænum á Selfossi. Kaffiveitingar verða í boði. Kl. 20 er þriðji opni fundur Katrínar og Gunnars þennan sunnudag í Skyrgerðinni í Hveragerði.
Katrín Jakobsdóttir heimsækir Rangárvallasýslu mánudagskvöldið 22. apríl klukkan 20.00 þar sem hún verður með opinn fund í Félagsheimilinu Hvoli, Hvolsvelli. Á þriðjudagsmorgninum 23. apríl tekur Katrín daginn snemma og heimsækir fólk, fyrirtæki og stofnanir á Hellu. Þegar því er lokið mun hún verða með hádegisverðarfund í Versölum, í Ráðhúsi sveitarfélagsins Ölfuss, kl. 12.
Velkomin til viðræðna við Katrínu um forsetaembættið og framtíðina.
Fréttatilkynning frá forsetaframboði Katrínar Jakobsdóttur
