3.4 C
Selfoss

Eðlilegir og heilbrigðir stjórnsýsluhættir

Heiðbrá Ólafsdóttir.

Hinn 3. mars síðastliðinn auglýsti Rangárþing eystra stöðu fulltrúa á sveitarskrifstofu Rangárþings eystra laust til umsóknar. Um var að ræða áhugaverða stöðu sem felur í sér margvíslega áskoranir í starfi meðal annars ýmiskonar samninga- og skjalagerð ásamt afleysingum í fjárhagsdeild sveitarfélagsins. Rangárþing eystra á mikið hrós skilið fyrir góða og virka fésbókarsíðu þar sem sveitarfélagið  hefur lagt  metnað sinn í að deila ýmsum góðum og hagnýtum upplýsingum fyrir íbúa sem og gesti sveitarfélagsins. Því vakti það undrun hjá undirritaðri þegar umrædd staða var einungis auglýst undir fréttayfirliti á heimasíðu sveitarfélagsins og hvergi annars staðar, til að mynda undir liðnum laus störf eða á fésbókarsíðu sveitarfélagsins. Þessu til viðbótar þá var auglýstur umsóknarfrestur einungis sex dagar eða til 9. mars en svo breytt þremur dögum seinna til 14. mars, eftir að undirrituð vakti athygli á stuttum umsóknarfresti.

Íbúar hvers sveitarfélags eiga skýlausan rétt til þess að sveitarstjórn tileinki sér eðlilega og heilbrigða stjórnsýsluhætti með hagsmuni allra íbúa að leiðarljósi. Um leið og við hvetjum ungt og menntað fólk til þess að setjast að í okkar sístækkandi sveitarfélagi verðum við að sýna það í verki að við erum tilbúin til þess að taka vel á móti því og deila með því öllum þeim tækifærum sem sveitarfélagið hefur fram á að bjóða, hverju sinni.

Öll getum við sammælst um opna og gegnsæja stjórnsýslu og aukið upplýsingaflæði til íbúa en það er ekki nóg að rita slíka viljayfirlýsingu niður á blað í kosningabaráttu eða við upphaf nýs kjörtímabils, heldur þarf einnig að fylgja því eftir í verki, annað eru það orðin tóm.

Í sístækkandi sveitarfélagi er mikilvægt að allar stjórnsýsluákvarðanir séu ávallt byggðar á vönduðum og vel ígrunduðum vinnubrögðum sveitarstjórnar sem endurspeglar góða stjórnsýslu.

Til þess að hægt sé að tryggja jafnræði og réttlátt samfélag er enn mikilvægara að sveitarstjórnarmenn hafi tryggt sé grunnþekkingu á góðum stjórnsýsluháttum og hafi beinan vilja til þess að framkvæma samkvæmt því.

Þetta er ekki í fyrsta sinn sem undirrituð sér tilefni til þess að  gagnrýna vinnubrögð sveitarstjórnar Rangárþings eystra og vísar þar í  opið bréf undirritaðra til sveitarstjórnar Rangárþings eystra dagsett þann 19. október 2020 en í stað þess að skrifa annað opið bréf til sveitarstjórnar hef ég ákveðið að taka beinan þátt í komandi sveitarstjórnarkosningum. Ég hef því tekið þeirri áskorun að bjóða fram krafta mína fyrir nýju sameinuðu framboði Nýja listans og L-listans í Rangárþingi eystra undir nafninu Nýi óháði listinn og þakka um leið traustið og hvatninguna.   Að framboðinu stendur breiður hópur heimamanna sem hefur ákveðið að taka sveitarstjórnarmálin í sínar hendur, að sameinast um mikilvæg og brýn málefni með því að bjóða fram krafta sína og hugsjónir með hagsmuni allra íbúa að leiðarljósi,  nýbúa sem og framtíðaríbúa, sveitarfélaginu öllu til framtíðarheilla.

Heiðbrá Ólafsdóttir,
íbúi í Rangárþingi eystra

 

 

 

 

 

 

 

Random Image

Nýjar fréttir