-0.6 C
Selfoss

Tónlistarhátíðin Englar og menn hefst á ný

Vinsælast

Tónlistarhátíðin Englar og menn hefst að nýju eftir árshlé í Strandarkirkju í Selvogi nk. sunnudag með tónleikum kl. 14. Á fyrstu tónleikum sumarsins koma fram sunnlensku einsöngvararnir María Sól Ingólfsdóttir sópran og Gunnlaugur Bjarnason baritón. Einar Bjartur Egilsson leikur með þeim á píanó og harmóníum.

María Sól Ingólfsdóttir er fædd og uppalin á Engi í Laugarási í Biskupstungum. Hún hefur unnið að fjölbreyttum verkefnum, óperum og hátíðum á sviði klassískrar- og samtímatónlistar seinustu ár. Hún útskrifaðist úr Listaháskóla Íslands árið 2019, hóf nám í Konunglega tónlistarháskólans í Den Haag í Hollandi en seinasta árið hefur hún sótt einkatíma hjá Janet Haney í London. María Sól trúir því að tónlist sé galdur.

Gunnlaugur Bjarnason baritónsöngvari er uppalinn á Selfossi þar sem hann tók sín fyrstu skref í tónlist við Tónlistarskóla Árnesinga. Hann lauk framhaldsprófi í söng frá Menntaskóla í tónlist árið 2020. Nú leggur hann stund á meistaranám í sama fagi við Konunglega tónlistarháskólann í Den Haag í Hollandi. Í janúar 2022 mun Gunnlaugur leika sitt fyrsta óperuhlutverk í uppsetningu á óperunni Mærþöllu eftir Þórunni Guðmundsdóttur.

Einar Bjartur lærði á píanó í Tónlistarskóla Mývatnssveitar, Tónskóla Sigursveins og síðar í Listaháskóla Íslands undir handleiðslu Peters Máté. Árið 2013 lék hann einleik í píanókonsert eftir F. Poulenc með Sinfóníuhljómsveit Íslands. Eftir Listaháskólann lagði hann stund á framhaldsnám í píanóleik í Hollandi. Samhliða náminu samdi hann tónlist og gaf út hljómplötu með eigin verkum að nafni Heimkoma árið 2016. Einar hefur spilað með ýmsum tónlistarmönnum bæði hérlendis og í Hollandi. Hann starfar nú sem píanókennari og meðleikari við Tónlistarskóla Árnesinga ásamt því að leika reglulega með kórum og listafólki á tónleikum og sýningum. Hann gaf nýlega út tvær hljómplötur með svissneskum píanóverkum og er um þessar mundir m.a. að vinna við undirbúning óperu, píanóeinleiks auk útgáfu á nýrri plötu með eigin tónlist. Aðrir tónleikar hátíðarinnar verða 25. júlí og 8. og 15. ágúst.

Aðgangseyrir á tónleikana er kr. 3.000 en tónlistarhátíðin er styrkt af Tónlistarsjóði Rannís og Sambandi sunnlenskra sveitarfélaga.

Listrænn stjórnandi hátíðarinnar er sem fyrr Björg Þórhallsdóttir.

Random Image

Nýjar fréttir