Hlaupaleiðirnar voru 12 kílómetrar, 22 kílómetrar og 60 kílómetrar og var fjölmennust þátttaka í 22 kílómetra hlaupinu, en þar voru 211 hlauparar ræstir út.
Það var töfrandi stemning á hálendinu allan daginn, enda fjöldi hlaupara og aðstandenda saman komnir í Kerlingarfjöllum.
Hlaupaleiðirnar lágu um margar af perlum Kerlingarfjalla og má þar helst nefna hina mögnuðu Hveradali og Kerlingu, sem fjallgarðurinn dregur nafn sitt af. Á leiðinni er útsýni yfir miðhálendið og jöklana tvo sem fjallgarðurinn liggur á milli, Hofsjökul og Langjökul. Heildarhækkun í 60 km leiðinni, er um 2.100 metrar og þar munar mest um Sléttaskarð á milli Ögmundar og Hattar sem hlauparar klífa eftir um 34 km hlaup.
Í fyrsta sæti í 60 km keppni karla var Helgi Halldórsson á tímanum 06:55:16 og í kvennaflokki var það Simona Vareikaitė sem fór með sigur af hólmi á tímanum 08:07:59. Í 22 km vegalengdinni var það Sigurjón Ernir Sturluson sem sigraði karlaflokkinn á tímanum 02:00:20 ogAðalheiður Ármannsdóttir sem sigraði í kvennaflokki á tímanum 02:30:40. Í 12 km voru það Marínó Valdimarsson og Halldóra Arnardóttir sem sigruðu karla- og kvennaflokk, á tímunum01:20:36 og 01:18:57. Frekari úrslit má nálgast á timataka.is.
Markmið skipuleggjenda er ávallt að verja viðkvæmt landslagið og því er hlaupið skipulagt í nánu og góðu samstarfi við Umhverfisstofnun. Mikið er lagt upp úr því að lágmarka áhrif á umhverfið og landslag svæðisins, enda fer hlaupið fram á friðlýstu náttúruverndarsvæði. Keppendur voru sérstaklega minntir á að hlaupa ekki utan stíga, bæði fyrir hlaup og í brautinni sjálfri, og eins var það tryggt að hlauparar bæru með sér rusl á milli drykkjarstöðva svo ekkert sorp yrði eftir úti í náttúrunni. Eins voru gestir hvattir til að sameinast í bíla til að takmarkaágang.
„Íslendingar eiga mikið inni í heimsóknum á miðhálendið og við erum því stolt af því að geta boðið hlaupurum fyrsta flokks gistingu og góða aðstöðu hér í fjöllunum og að geta þannig kynnt þennan áfangastað fyrir bæði Íslendingum og erlendum gestum.“ bætir Ingi Þórarinn Friðriksson, forstöðumaður Kerlingarfjalla við að lokum.
Mikil gróska hefur verið í heimi íslenskra utanvegahlaupa undanfarin ár og er Kerlingarfjöll ULTRA orðið fastur liður í hlaupadagatali íslenskra, sem erlendra,hlaupara.
Meðfylgjandi myndir eru aðsendar.
