Guðmundur Vignir Sigurðsson barnalæknir á HSU, fékk á dögunum viðurkenningu úr Verðlaunasjóði Óskars Þórðarsonar læknis við Háskóla Íslands, ásamt tveimur öðrum barnalæknum. Viðurkenningin er fyrir góðan árangur í rannsóknum og þróunarstarfi tengdu heilsu barna og barnasjúkdómum. Hin eru þau Berglind Jónsdóttir og Snorri Freyr Dónaldsson.
Guðmundur Vignir hefur rannsakað beinþéttni og líkamssamsetningu ungs fólks, á aldrinum 18-27 ára, sem hefur glímt við bólgusjúkdóma í meltingarvegi frá barnsaldri. Helstu niðurstöður hans eru þær að ungt fólk, sér í lagi karlmenn með sjúkdóminn frá barnsaldri, var með mun minni beinþéttni en jafnaldrar á fullorðinsaldri.
Hin tvö rannsökuðu annars vegar skjaldkirtilssjálfsónæmi hjá börnum með og án sykursýki af gerð 1 og hins vegar öndunaraðstoð ungbarna strax eftir fæðingu, með sérstakri áherslu á minnstu fyrirburana og þróun tækis til öndunaraðstoðar.
