Matgæðingur vikunnar er Vignir Þór Sigurjónsson.
Ég vil þakka Rúnari Helga a.k.a Mixaranum fyrir þessa skemmtilegu áskorun.
Þetta er einfaldur og fjölskylduvænn taco-réttur sem fær smá auka lyftingu með því að baka taco-skeljarnar með hakki og osti í ofni. Ferska salsað gefur síðan réttinum skemmtilegt mótvægi með fersku og léttu bragði.
Hráefni
Taco
- 1 pakki af hörðum taco-skeljum
- 1 pakki af nautahakki
- 1 poki taco-krydd
- Rifinn ostur eftir smekk
Ferskt salsa
- 3–4 tómatar
- ½ rauðlaukur
- 1 avókadó
- 1 lime
- Salt og svartur pipar eftir smekk
Meðlæti
- Salsa-sósa
- Sýrður rjómi
Aðferð
Byrjið á að steikja hakkið á pönnu og kryddið með taco-kryddi. Steikið þar til hakkið er vel brúnað og tilbúið.
Raðið taco-skeljunum þétt saman í eldfast mót svo þær standi vel. Setjið steikta hakkið ofan í hverja skel og stráið síðan góðu lagi af rifnum osti yfir.
Setjið mótið inn í ofn og bakið þar til osturinn er bráðinn og orðinn fallega gullinn.
Ferskt salsa
Skerið tómatana, rauðlaukinn og avókadóið í litla bita og setjið saman í skál. Kreistið ferskan limesafa yfir og blandið öllu varlega saman svo avókadóið haldi lögun sinni. Kryddið með salti og nýmöluðum svörtum pipar eftir smekk.
Látið salsað standa í nokkrar mínútur áður en það er borið fram svo bragðið nái að blandast vel saman.
Berið taco-in fram heit og stökk, beint úr ofninum, með ferska salsanu, salsa-sósu og góðri skeið af sýrðum rjóma.
Verði ykkur að góðu!
Ég ætla að skora á mikinn matgæðing Baldur Bjarka Jóhannson, Hann talar mikið um hæfileika sýna í matargerð og núna þarf hann að standa undir nafni.
Matgæðingar eru beðnir að senda á dfs@dfs.is uppskrift ásamt mynd af sér eigi síðar en á sunnudegi.
