Hveragerði er fallegur bær á stórkostlegum stað, ég hef verið svo heppinn að búa þar í yfir tíu ár og er mér einstaklega hlýtt til bæjarins. ég hef unnið við húsbyggingar síðan uppúr fermingu og geri enn. Hef byggt og endurnýjað á annan tug húsa og íbúða í Hveragerði s.l. ár. Fram til þessa hafa lóðir í bænum verið á frekar skaplegu verði, þ.e. gatnagerðargjald ásamt byggingarleyfisgjöldum.
Lóð undir einbýli kostaði rétt um 7 milljónir haustið 2021 innifalið í því verði voru öll gjöld til bæjarins. Seinniparts sumars 2025 fékk sonur minn úthlutað einbýlishúsalóð í nýjasta hverfi bæjarins, verðmiðinn á þeirri lóð var rúmar 21 milljón, sama stærð og áður og sama byggingarmagn. Það er þreföldun á 4 árum! Þá er verð á lóðum undir bæði parhúsaíbúð sem og raðhúsaíbúð um 10 milljónir sem gerir auðvitað ekkert annað en að hækka verð þessara íbúða verulega.
Fasteignamat hefur hækkað mikið í bænum á s.l. árum og eru tekjur bæjarins verulegar þar, núverandi meirihluti Okkar Hveragerðis og Framsóknar sló sig til riddara með yfirlýsingu um að þau hefðu lækkað gjöldin í ár. Reyndar var það álagningarprósentan sem þau lækkuðu um 0,1 prósentustig en þar sem hækkun fasteignamats milli ára var 8-10% breytti þetta litlu, fasteignagjöld flestra hækkuðu um 7-9%.
Ég hitti bæjarstjóra okkar í sumar og sagði honum mína skoðun, m.a. að það væri mikil skekkja í lóðarverði undir parhús og raðhús, þar sem á raðhúsalóð er mun minna byggingarmagn en á parhúsalóð, þar af leiðir að fermetraverð lóðar í raðhúsi deilist á færri fermetra og hækkar því verð á eigninni hlutfallslega. Teldi ég þetta verð væri komið upp í rjáfur og væri ekki til að hjálpa til við að fá nýjar fjölskyldur í bæinn. Hann hló við og sagði mér að hann liti á Hveragerði sem Garðabæ Suðurlands, hér væri takmarkað landrými og því ætti að selja lóðir dýrt.
Vel má vera að þetta sé almenn skoðun núverandi meirihluta, eða þeirra sem eftir eru þar, þó að það hafi ekki komið fram í kosningabaráttu þeirra svo ég viti. Auðvitað þurfa þau að ná sér í fjármagn til að standa við öll kosningaloforðin, 640 milljóna íþróttahús sem átti að rísa á einu ári, gerfigrasvöll sem átti að vera tilbúinn fyrir einu og hálfu ári, himinhárri leigu fyrir illa byggðan leikskóla, ásamt öllum hinum stórkostlegu loforðunum. Og auðvitað ráðgjafakostnaðurinn við allt þetta er ekki gefins.
Nú þegar er búið að eyða upp undir milljarði í gerfigrasvöll, þar sem reyndar fauk nýlagt gerfigras af vellinum sem stendur en ókláraður, 200 milljónir eru komnar í holuna undir viðbyggingu við íþróttahúsið og búið að taka 600 milljón króna tilboði í fokhelt hús, þá eru eftir ca 60-70% kostnaðar svo að heildarkostnaður fer úr 640 milljón króna loforði um íþróttahús í ca 2000 milljónir!
Ég sakna þeirra tíma þegar ákvaraðnir voru teknar af kjörnum fulltrúum í bænum og af fólki sem starfaði fyrir bæinn af heilum hug en ekki af ábyrgðarlausum sérfræðingum á verkfræðistofum í Reykjavík.
Brynleifur Siglaugsson
