Í nútímasamfélagi telst starfsemi leik- og grunnskóla til mikilvægrar grunnþjónustu sem sveitarfélög þurfa að halda vel utan um. Í Hveragerði eru starfræktar öflugar menntastofnanir sem hafa í flestum tilvikum vaxið og dafnað í takt við fjölgun íbúa. Það er þó afar mikilvægt að bæjaryfirvöld hverju sinni lesi stöðuna rétt og hafi skýra sýn á framtíðaruppbyggingu. Uppbygging leik- og grunnskóla þarf að vera þannig úr garði gerð að íbúar finni fyrir öryggi varðandi þjónustuna og geti treyst því að hún standi undir þörfum samfélagsins.
Á þessu kjörtímabili lenti ég og mín fjölskylda í óheppilegri stöðu þegar yngsta barnið okkar fékk ekki leikskólapláss fyrr en tæplega tveggja og hálfs árs gamalt. Slík staða getur skapað vandamál í daglegu skipulagi fjölskyldna og getur einnig haft fjárhagsleg áhrif þar sem foreldrar þurfa að gera sérstakar ráðstafanir til að samræma vinnu og fjölskyldulíf. Við teljum okkur þó meðal þeirra „heppnu“ fjölskyldna sem búa við öflugt bakland sem gat hlaupið undir bagga þegar mest á reyndi. Ekki eru allar fjölskyldur í þeirri stöðu. Að mínu mati er það ábyrgðarhluti sveitarstjórna að tryggja að slíkar aðstæður komi ekki upp.
Hættum að bregðast við – hugum að fyrirbyggjandi nálgun
Þegar kemur að uppbyggingu leik- og grunnskóla í sveitarfélögum er mikilvægt að stjórnvöld horfi til framtíðar og taki mið af íbúaþróun samfélagsins. Foreldrar leik- og grunnskólabarna eiga að geta treyst því að þjónustan sé til staðar þegar hennar er þörf.
Sveitarfélög mega ekki stöðugt vera að bregðast við ástandinu, heldur þarf að huga að fyrirbyggjandi aðgerðum. Slík nálgun felur í sér að bæjaryfirvöld horfi langt fram í tímann og hafi skýrar áætlanir um hvað þurfi að gera, hvenær eigi að ráðast í framkvæmdir og hvernig þær verði fjármagnaðar. Þannig má tryggja stöðugleika og fyrirsjáanleika í þjónustu við íbúa.
Sammála um margt – en ekki allt
Sem betur fer hefur ríkt ágæt samstaða í Hveragerði um margt sem varðar uppbyggingu menntastofnana.Til að mynda eru viðbyggingar grunnskólans á síðustu árum gott dæmi um vel heppnaðar framkvæmdir. Við uppbyggingu grunnskólans var endirinn skoðaður í upphafi og tímasetningar framkvæmda hafa rímað vel við þörf samfélagsins hverju sinni.
Þegar kemur að uppbyggingu leikskóla hefur hins vegar ekki ríkt sama samstaða. Þar hefur bæði verið tekist á um hvað eigi að gera og hvernig eigi að fjármagna framkvæmdir. Grunninnviðir á borð við leikskóla eiga að vera í eigu sveitarfélagsins sjálfs en ekki teknir á leigu líkt og gert var með viðbyggingu við Leikskólann Óskaland á þessu kjörtímabili. Reynslan sýnir okkur að til lengri tíma er fjárhagslega hagkvæmara fyrir sveitarfélög að standa sjálf að slíkri uppbyggingu og fjármagna hana, eftir atvikum, með lántöku.
Lærum af mistökum og horfum fram á við
Það liggur fyrir að á næstu árum þarf að ráðast í frekari uppbyggingu bæði leik- og grunnskóla í sveitarfélaginu. Við þær framkvæmdir þarf að horfa heildstætt á þá fjármögnunarmöguleika sem standa til boða. Það veldur mér áhyggjum að samkvæmt nýjustu fjárfestingaráætlun sveitarfélagsins virðist stefnt að því að fara sömu leið í uppbyggingu næsta leikskóla og farin var við stækkun Óskalands.
Það er því mikilvægt að ræða þessa uppbyggingu nánar í aðdraganda sveitarstjórnarkosninga. Við þurfum að horfast í augu við raunveruleikann, læra af þeim mistökum sem kunna að hafa verið gerð og jafnframt hafa kjark til að viðurkenna þegar eitthvað hefur farið úrskeiðis. Aðeins þannig getum við tekið upplýstar ákvarðanir um framtíðina.
Sigmar Karlsson
Skipar 3. sæti á D-listanum í Hveragerði
