Úthlutað var styrkjum til tveggja nemenda úr Vísinda- og rannsóknarsjóði Suðurlands við hátíðlega athöfn á Hótel Selfoss sl. þriðjudag. Styrkirnir eru veittir til námsverkefna á háskólastigi og tengjast Suðurlandi með ótvíræðum hætti.
Að þessu sinni var úthlutað styrkjum til mastersnema við Háskóla Íslands og doktorsnema við Landbúnaðarháskóla Íslands. Markmið Vísinda- og rannsóknarsjóðsins er að styrkja stúdenta sem eru að vinna að lokaprófsverkefni til rannsóknarstarfa á Suðurlandi. Til að koma til álita sem verðlaunaverkefni þá þarf það að tengjast sunnlensku atvinnulífi eða menningu eða náttúru sterkum böndum.
Halla Tómasdóttir forseti Íslands heiðraði samkomuna með nærveru sinni og minnti gesti á að hugvit og samvinna eru okkar dýrmætasta auðlind: “Leggið kapp á að miðla reynslu ykkar og rannsóknum sem oftast og til sem flestra og verið sjálf forvitin um það sem önnur eru að fást við. Óvæntustu og jafnvel merkustu uppgötvanir eru oft gerðar þegar fólk af ólíkum fræðasviðum vinnur saman að því að dýpka þekkingu okkar og vinna saman að því að nýta þá þekkingu til að bæta heiminn”.
Stúlknahljómsveit Hvolsskóla setti tóninn í upphafi hátíðarfundar með kraftmiklu og fersku opnunaratriði. Hljómsveitin sem er skipuð stelpum í Hvolsskóla kom svo aftur í lokin og lauk dagskránni með léttleika og gleði í flutningi og gerði viðburðinn eftirminnilegan.
Verðmætasta auðlindin
Í opnunarávarpi lagði Ingveldur Sæmundsdóttir, framkvæmdastjóri Háskólafélags Suðurlands, áherslu á mikilvægi sköpunarkraftsins.
„Sköpunarkraftur, hugvit og samvinna er dýrmætasta auðlindin,“ sagði Ingveldur og benti á að stærsta samkeppnisforskot Suðurlands til framtíðar væri hæft fólk.
Hún undirstrikaði einnig hlutverk Háskólafélagsins við að tengja saman háskóla og atvinnulíf og nefndi sérstaklega mikilvægi þess að nýsköpun nái inn í starfandi fyrirtæki, ekki síður en sprotafyrirtæki.
Fundarstjóri var Sigurður Böðvarsson, framkvæmdastjóri lækninga- og sjúkrasviðs og yfirlæknir krabbameinslækninga á Heilbrigðisstofnun Suðurlands, sem hélt einnig áhugavert erindi um nýsköpunarverkefni tengd HSU.
Rannsóknir sem skipta máli fyrir nærsamfélagið
Í ár bárust 16 umsóknir í sjóðinn, sem er til marks um þá miklu grósku sem er í rannsóknarstarfi tengdu Suðurlandi. Stjórn sjóðsins, sem Sveinn Aðalsteinsson framkvæmdastjóri Orkídeu situr í ásamt Sigurði Sigursveinssyni, fyrrum framkvæmdastjóri Háskólafélags Suðurlands, og Lilju Jóhannesdóttur, fyrrum forstöðumanns Náttúrustofu Suðausturlands, ákvað að skipta 2 milljóna króna styrknum jafnt á milli tveggja verkefna.
Bæði verkefnin eiga það sameiginlegt að auka skilning okkar á náttúru Suðurlands, hvort sem horft er til fortíðar eldstöðva eða framtíðar í loftslagsmálum.
Piia Tomingas (Landbúnaðarháskóli Íslands)
Verkefni Piiu snýst um að skilja hvernig endurheimt votlendis og rykákomur (fok úr jarðvegi) hafa áhrif á lífríki í votlendi á Suðurlandi. Verkefnið hefur mikla þýðingu við aðgerðir til að endurheimta votlendi sem vísindamenn eru sammála um að sé þýðingarmesta aðgerðin við að draga úr losun koltvísýrings í landbúnaði og þar með draga úr kaupum á losunarheimildum sem stjórnvöld standa frammi fyrir á næstu árum. Verkefnið hefur því bæði fræðilega og hagnýta skírskotun.
Þorbjörg Anna Gísladóttir (Háskóli Íslands)
Hlaut styrk fyrir rannsóknir á gossögu og uppruna bergs Heklu og Vatnafjalla. Þorbjörg rýnir langt aftur í tímann, eða meira en 11.000 ár, til að kortleggja gossögu svæðisins. Með því að efnagreina gamalt berg er hægt að lesa í hegðun Heklu. Þessi þekking er mikilvæg fyrir öryggi íbúa og ferðafólks á Suðurlandi, því fortíðin gefur okkur vísbendingar um hvað framtíðin ber í skauti sér.
Verkefnið stendur traustum fótum í bæði fræðilegum og hagnýtum skilningi. Allt sem eykur þekkingu almennings og viðbragðsaðila á Suðurlandi á kenjum Heklu er af hinu góða og afar nauðsynlegt. Ekki aðeins vegna öryggissjónarmiða, heldur er það líka fræðileg skylda að skilja betur þetta tignarlega fjall og þá ofurkrafta sem þar búa undir.
Menntaverðlaun Suðurlands
Við sama tilefni voru Menntaverðlaun Suðurlands vegna 2025 afhent. Handhafi Menntaverðlauna Suðurlands 2025 er Íslenskuskólinn: Hagnýt orðaforðakennsla í ÍSAT við Grunnskólann á Hellu.
Sjá frétt:Íslenskuskóli Grunnskólans á Hellu handhafi Menntaverðlauna Suðurlands 2025
Þróunarverkefnið Íslenskuskóli miðar að því að þróa, prófa og skjalfesta nýtt kennslulíkan í íslensku sem annað mál (ÍSAT) fyrir tví- og fjöltyngda nemendur í grunnskóla. Sérstök áhersla er lögð á nemendur sem eru fæddir á Íslandi, tala annað tungumál heima hjá sér og hafa verið lengi í íslensku skólakerfi en skortir samt íslenskan orðaforða, sem hefur áhrif á námsárangur, þátttöku og sjálfstraust.
Dagurinn var sannkölluð uppskeruhátíð fyrir þekkingu og framfarir í landsfjórðungnum.
Háskólafélag Suðurlands
