Bergþóra Eiðsdóttir hefur tilkynnt að hún gefi kost á sér til formanns Verkalýðsfélags Suðurlands, en stjórnarkjör hjá félaginu fara fram á vormánuðum. Hún hefur starfað hjá félaginu frá október 2024. Bergþóra býður sig fram gegn sitjandi formanni, Guðrúnu Elínu Pálsdóttur, sem hefur starfað hjá félaginu frá árinu 2002.
Þetta verða fyrstu stjórnarkosningar í sögu Verkalýðsfélags Suðurlands, en hingað til hafa listar uppstillingarnefndar verið sjálfkjörnir. Á næstu vikum mun Bergþóra halda fundi með félagsmönnum víðs vegar um félagssvæðið og kynna meðframbjóðendur til stjórnar.
Í tilkynningu frá framboðinu kemur fram að Bergþóra sé spennt fyrir komandi kosningabaráttu og hlakki til að bjóða félagsmönnum upp á raunverulegt val um forystu í fyrsta sinn í sögu félagsins. Hún leggur sérstaka áherslu á að félagið verði enn sterkara, aðgengilegra og nær félagsmönnum sínum, með skýra þjónustu, gagnsæi og virkt samtal.
Hún vill m.a.:
- Auka aðgengi að þjónustu félagsins og tryggja að heimasíðan og „Mínar síður“ séu aðgengilegar á helstu tungumálum félagsmanna.
- Ráða kjaramálafulltrúa sem talar íslensku, ensku og pólsku til að tryggja raunverulega þjónustu við alla félagsmenn.
- Bæta orlofskerfi félagsins með einfaldari lyklaafhendingu, uppfærslu og viðhaldi svo félagsmenn njóti eigna sinna til fulls.
- Nálgast samstarf við atvinnurekendur af festu en útsjónarsemi.
- Leita leiða til að hjálpa félagsmönnum að komast úr leigu í eigið húsnæði.
- Viðhalda gagnsæi með því að birta ársskýrslu félagsins á heimasíðu og skýrri upplýsingagjöf um fjármuni félagsins.
- Sjá til þess að þjónusta sé aðgengileg félagsmönnum á öllu félagssvæðinu.
- Tryggja að félagsmenn fái snögg svör við fyrirspurnum, innan sólarhrings. Bergþóra leggur áherslu á að félagsmenn eigi lokaorðið í öllum mikilvægustu ákvörðunum, þar á meðal hugsanlegum sameiningum við önnur stéttarfélög og fjárfestingum, og að félagið starfi fyrst og fremst fyrir þá félagsmenn sem því tilheyra.
