Þegar jólin nálgast fer fólk að huga að jólagjöfum. Þá er oft sniðugt að gefa eitthvað heimagert. Jólahúfa Gumma litla er tilvalin jólagjöf fyrir börn á öllum aldri og ætti hver sem er að geta prjónað hana.
| Stærðir: | 1 -3 ára | 4-6ára | 7-10 ára |
| Höfuðmál | 43-47 cm | 48-52 cm | 53-57cm |
| Lengd í cm að úrtöku | 14 cm | 16 cm | 18 cm |
Athugið að börn eru mis höfuðstórt og því gott að taka mál áður en hafist er handa.
GARN:
Bio Balance frá BC garn, eða það garn sem hentar prjónfestunni Garnið fæst hjá Bobbý Hveragerði og bobby.is
| Stærðir | 1-3 ára | 4-6 ára | 7-10ára |
| Garnmagn | 50 gr | 50 gr | 100 gr |
Prjónfesta er 25 lykkjur á 10 cm í sléttu prjóni á 3,5 mm prjóna
ÞAÐ SEM ÞARF:
Hringprjóna 3 og 3,5 mm, 40 Sokkaprjóna /crazy trio 3 og3,5 mm Stoppunál til að ganga frá endum.
TÆKNIUPPLÝSINGAR :
Húfan er prjónuð í hring. Fyrst er stroff prjónað, ein lykkja slétt og ein lykkja brugðin. Stroffið er annað hvort saumað niður eða prjónað saman svo það verði tvöfalt.
Í lokin er búinn til skúfur og band snúið til að festa skúfinn við húfuna.
UPPSKRIFT:
Fitjið laust upp, 108 – 120 – 132 lykkjur á 3 mm prjóna og prjónið eina lykkju slétt og eina lykkju brugðið út umferð, setjið prjónamerki við upphaf umferðar.
Prjónið Stroff 10 – 11 – 12 cm (verður 5 – 5,5 – 6 cm). Prjónið saman stroffið, það er gert þannig: Takið upplykkjur þar sem fitjað var upp, með auka prjón, brjótið verkið innaf þannig að lykkjurnar sem teknar voru upp eru fyrir innan, skiptið yfir á prjón 3,5 mm og prjónið eina lykkju af hvorum prjóni alla umferðina með sléttu prjóni. Þegar húfan er orðin 14 – 16 – 18 cm er byrjað á úrtöku.
ÚRTAKA:
- Úrtaka *prjónið 9 – 10 – 11 lykkjur slétt, prjónið næstu 2 lykkjur saman, (verður 1 lykkja)* Prjónið áfram eins og sagt er innan stjörnu (*…*).
- Prjónið 7 umferðir án úrtöku, slétt.
ATH! Næst þegar tekið er úr er einni lykkju færra á milli úrtaka s.s. í stað 10 lykkja eru 9 lykkjur o.s.frv.
Á milli úrtaka eru alltaf 7 umferðir, takið úr þar til að 12 lykkjur eru eftir. Slítið frá og þræðið bandið í gegnum allar lykkjurnar.
Skúfur:
Það er hægt að nota hvað sem er til að vefja upp garnið í skúfinn t.d. búa til skapalón úr pappa, hér er vídeóslóð af fínum skúf: https://youtube.com/shorts/cMOqHhLP25c?si=_V6q_M9w2ICTgExc
Vefjið garninu utan um pappírsörkina þar til óskaðri þykkt er náð. Klippið bandið frá. Þræðið band í nálina og stingið undir vafninginn, hnýtið vel. Fjarlægið af pappírnum og notið annan þráð til þess að binda fast utan umþræðina á öðrum endanum eða gerið snúru (snúa bandið saman) og notið þetta band/snúru líka til að festa við sjálfa húfuna.
Vefjið ca 2 cm frá hnútnum nokkrum sinnum og hnýtið vel. Klippið upp þræðina á endanum sem ekki eru bundnir saman.
Gangið vel frá eftir að snúna bandinu sem heldur skúfnum hefur verið komið fyrir á enda húfunnar, festið vel með spottanum.
Gangið vel frá endum, ef þið valið var að sauma niður stroffið í staðinn fyrir að prjóna saman, passið að sauma stroffið ekki of strekkt niður.
Skolið í höndum með ullarsápu og köldu vatni, kreistið vatnið úr og leggið til þerris.
Uppskrift: Bobbýjardætur hjá Bobby.is
Breiðumörk 13
810 Hveragerði
Sími: 774-2324
Email: info@bobby.is
