Laugardaginn 1. nóvember klukkan 20:00 verða hrekkjavökutónleikar í Skálholtsdómkirkju, þar sem Jón Bjarnason dómorganisti í Skálholti ætlar að þenja orgelið með „hræðilegum“ lögum. Einsöngvari á tónleikunum verður Alexandra Chernyshova sem syngur meðal annars Vocalisu eftir Sergei Rachmaninoff.
Jón ætlar að spila óhugnanleg lög, eða lög sem tengja má við hrekkjavöku. Þar má nefna Tokkötu og fúgu Bachs í d-moll, This is Halloween úr Nightmare Before Christmas, stefið úr Addam’s family og margt fleira í þeim dúr… eða moll. Jafnvel má búast við því að óperudraugurinn láti sjá sig.
Veitingastaðurinn Hvönn verður opinn og býður tónleikagestum sérstakt tilboð á hamborgara og köldum á krana. Tilvalið er að nýta sér það!
