Eldvirkni á Sundhnúksgígaröðinni heldur áfram af krafti og eru enn tveir gígar virkir. Nóttin hefur verið viðburðalítil að öðru leyti, en í morgunsárið mældist gasmengun og gosmóða á suðvesturhorninu.
Brennisteinsdíoxíð (SO₂) mælist nú í óhollu magni fyrir viðkvæma einstaklinga bæði á Höfuðborgarsvæðinu og Akranesi, samkvæmt upplýsingum frá Umhverfis- og orkustofnun.
Spáð er auknum vindi síðdegis og gæti hann dregið úr mengun bæði frá gosmóðu og brennisteinsdíoxíði.
Á vefnum loftgaedi.is eru eftirfarandi viðbrögð ráðlögð:
- Fylgist með loftgæðum.
- Dragið úr áreynslu utandyra ef einkenni gera vart við sig.
- Ung börn ættu ekki að sofa úti í vagni.
- Eldri börn ættu að halda sig innandyra og forðast álag.
- Loftræstingu ætti að slökkva á, ef mögulegt er.
