Margvísleg verkefni hlutu styrki úr vorúthlutun Fræðslu- og verkefnasjóðs UMFÍ. Sjóðurinn úthlutaði rétt tæpum 12,6 milljónum króna til 73 verkefna. Alls bárust 82 umsóknir um styrki til sjóðsins. Átta verkefni aðildarfélaga HSK hlutu styrk að þessu sinni.
Verkefnin eru mjög fjölbreytt, allt frá þjálfaranámskeiðum og eflingu badmintons, fræðsluerinda ýmiss konar, fræðsluferða til Danmerkur, til sagnaritunar og margs fleira.
Markmið sjóðsins er að styrkja félags- og íþróttastarf ungmennafélagshreyfingarinnar í samræmi við stefnu UMFÍ, m.a. með því að auka menntun og þekkingu félaga innan hreyfingarinnar á íþróttagreinum, þjálfun í félagsmálum og félagsstarfi.
Rétt til umsóknar úr sjóðnum eiga sambandsaðilar UMFÍ, aðildarfélög sem eru virk í starfi og deildir innan þeirra. Einnig eiga stjórn og nefndir UMFÍ rétt á að sækja um styrk úr sjóðunum.
Umsóknarfrestir eru tveir á ári. Að hausti opnar fyrir umsóknir 1. október og er hægt að senda umsóknir inn til og með 1. nóvember. Aðildarfélög eru hvött til að sækja um í haust. Það fær enginn styrk úr sjóðnum nema sótt sé um.
Verkefni innan HSK sem hlutu styrk:
| Félag/deild | Verkefni | Upphæð |
|---|---|---|
| Motocrossdeild Umf. Selfoss | Keppnistjóranámskeið í Rugby í Bretlandi á vegum FIM | 150.000 kr |
| Fimleikadeild Umf. Þór | Þjálfaranámskeið | 300.000 kr |
| Umf. Biskupstungna | Málstofa um íþróttamál í Uppsveitum | 50.000 kr |
| Knattspyrnufélag Rangæinga | Endurmenntunarferð þjálfara til Danmerkur | 200.000 kr |
| Körfuknattleiksfélag Selfoss | Karakter í Selfoss Körfu | 288.000 kr |
| Fimleikadeild Umf. Selfoss | Þjálfaranámskeið | 110.000 kr |
| Fimleikadeild Umf. Selfoss | Fræðsluferð til Danmerkur | 200.000 kr |
| Fimleikadeild Umf. Selfoss | Móttökunámskeið | 75.000 kr |
| Samtals | 1.373.000 kr |
