Laugardaginn 14. júní 2025 kl. 14 – 16 munu náttúrufræðingarnir Einar Þorleifsson, Rannveig Thoroddsen og Skúli Skúlason leiða létta fræðslugöngu um Þrastaskóg og Sogið. Litið verður eftir foldarskarti í skógarbotni og lagt við hlustir eftir fuglasöng á grein eða kvaki á Soginu, um leið og fræðst verður um lífríki Sogsins, tengsl þess við Þingvallavatn, með áherslu á fiska, og dregin fram sérstaða þess og verðmæti og sett í alþjóðlegt samhengi.
Dagskráin hefst á hlaði Alviðru, sem er fræðslusetur Landverndar. Síðan verður haldið að Þrastalundi og gengið um skóginn og meðfram Soginu. Fræðslugangan er ætluð fólki á öllum aldri og börnin eru svo sannarlega velkomin. Takið með viðeigandi hlífðarfatnað og kíkir gætu komið að notum. Við lok göngu verða þjóðlegar veitingar í boði í Alviðrubænum.
Sogið, Alviðrujörðin og Þrastaskógur er ævintýraheimur. Verið velkomin.
Alviðrunefnd Landverndar.
