Ari Már Gunnarsson er matgæðingur vikunnar.
Ég vil byrja á að þakka vini mínum Steinari fyrir áskorunina og traustið. Challenge accepted!
Þess má geta að þegar ég át allar þessar pylsur hér í forðum daga var þetta í afmælisveislu hjá mér. Ef ég man rétt voru þetta 13-14 stk. í brauði.
Allt þetta át varð til þess að pabbi minn þurfti að skjótast út í búð og kaupa fleiri pylsur fyrir mig. Á meðan biðu afmælisgestir eftir mér inni í stofu, spenntir að horfa á bíómynd.
En hins vegar er réttur sem er í miklu uppáhaldi hjá mér og það er kjúklingalasagna, hann toppar klárlega Steinars Hot dog special.
Kjúklingalasagna fyrir ca. 4-6 manns
3-4 kjúklingabringur
1 rauðlaukur
1 paprika
2 hvítlauksrif
2 krukkur salsa sósa
1/2 krukka af ostasósu
Ca 150 gr rjómaostur
Mexíkönsk kryddblanda eða taco krydd
Tortilla-kökur
Rifinn ostur
Aðferð
Bringurnar eru skornar í bita og steiktar á pönnu, kryddaðar og settar til hliðar.
Laukur og paprika eru steikt á pönnu og hvítlauknum svo bætt út á og steiktur með í 2 mín.
Stóri potturinn er tekinn fram og salsasósan og rjómaosturinn settur út í og hitað saman. Kjúklingnum og grænmetinu er svo blandað út í eftir það.
Þetta er svo sett saman með tortillakökum og ostasósu til skiptis í eldfastmót og slatta af rifnum osti yfir í lokin og hent inn í ofn í ca 10 mín.
Ísköld Pepsi Max og svart dorittos er killer með þessu.
Getur ekki klikkað!
Ég ætla ég að skora á vin minn hann Alexander Þórsson að vera matgæðing næstu viku. Ég held að hann komi ansi á óvart þegar kemur að matreiðslu.
