Málstofa um íþróttamál í Uppsveitum Árnessýslu var haldin í Aratungu sunnudaginn 27. apríl sl. Þar sem ætlunin var að ræða saman um möguleikana á að stækka og efla íþróttastarfið í Uppsveitunum. Það voru Heilsueflandi Uppsveitir og Sveitarfélagið Grímsnes- og Grafningshreppur sem stóðu að skipulagningunni í samstarfi við HSK og svæðisstöð íþróttahéraða á Suðurlandi.
Viðburðurinn heppnaðist frábærlega. Mætingin var framar björtustu vonum og voru gestir ánægðir með þau erindi sem hlýtt var á, en annars vegar fjallaði Jóhann Árni Ólafsson um Grindavíkurleiðina og hins vegar hélt Vésteinn Hafsteinsson erindi undir yfirskriftinni Áfram Ísland – samvinna til árangurs. Þá var dýrindis kaffihlaðborð í boði og að lokum fór vinnustofa fram þar sem rætt var um íþróttaaðstöðu í Uppsveitum, núverandi starfsemi íþróttafélaganna á svæðinu og framtíðarsýn.
„Það er ánægjulegt að finna kraftinn og bjartsýnina sem býr á svæðinu og nokkuð ljóst að samstarf og samvinna verður efld á komandi mánuðum, íþróttastarfinu til heilla”, sagði Rakel Magnúsdóttir svæðisfulltrúi íþróttahéraða á Suðurlandi eftir vel heppnaðan dag í Aratungu.
