Á vorfundi Brunavarna Árnessýslu bs. í gær var samþykkt að undirbúa rekstur slökkvistöðvar á Borg í Grímsnes- og Grafningshreppi.
Grímsnes- og Grafningshreppur greinir frá þessu á heimasíðu sinni.
„Sveitarstjórn Grímsnes- og Grafningshrepps fagnar niðurstöðum vorfundarins og hlakkar til að efla starfsemi Brunavarna Árnessýslu í sveitarfélaginu,“ segir í tilkynningu frá sveitarfélaginu.
Í Grímsnes- og Grafningshrepp er stærsta frístundahúsabyggð landsins, en þar eru 22% allra frístundahúsa á landinu og það eru því ríkir almannahagsmunir að viðbragðstími hjá viðbragðsaðilum sé með besta móti sem hægt er, bæði fyrir íbúa og fasteignaeigendur.
Sveitarfélagið stefnir á að byggja u.þ.b. 200 m2 hús til leigu fyrir starfsemi Brunavarna Árnessýslu og stefnt er að því að taka húsnæðið í notkun á árinu 2026. Slökkvistöðin verður í Þinggerði 1, sem er lóð í eigu sveitarfélagsins og staðsett við Grímstorg og við Sólheimaveginn.
Áætlað er að gerður verði sérstakur samningur um afnot af húsnæðinu með möguleika á kaupum í framtíðinni.
