Landvernd heldur árlega keppnina „Ungt umhverfisfréttafólk“ þar sem ungmenni fá vettvang til þess að kynna sér umhverfismál og koma upplýsingum á framfæri á skapandi hátt. Fjölbrautaskóli Suðurlands bar sigur úr býtum í ár. Sigurvegurunum er boðið að taka þátt í alþjóðlegu keppninni Young Reporters for the Environment. Af fimm verkefnum sem rötuðu í úrslit átti FSu tvö, verkefnin „Kára hval“ eftir Axel Sturlu, Konráð Inga og Sunnu Hlín og „Afneitun manns“ eftir Ólöfu Völu.
Kári hvalur, sem er barnabók um samnefndan hval, sigraði keppnina. Í bókinni er sagt frá ævintýrum hans í ljóðrænum texta en hún er í raun ekki bók fyrir börn þar sem Kári hvalur lendir í hræðilegum atburðum og missir að lokum foreldra sína. Verkefnið er því sterk ádeila á hvalveiðar Íslendinga. Höfundar bókarinnar sáu einnig um að myndskreyta hana.
Verkefnið var upphaflega unnið í landafræði þar sem nemendur þurftu að skoða vandamál í sínu nærumhverfi sem tengjast hafinu. „Þar kviknaði þessi hugmynd sem þróaðist í þetta frábæra verkefni. Verkefnið er unnið á hverri önn í landafræði og nemendur hvattir til að taka þátt í keppni Landverndar og nú hefur umhverfisfræðin einnig ákveðið að hvetja nemendur til þátttöku í þessu frábæra verkefni,“ segir á heimasíðu FSu.
