Sigríður Guðlaug Björnsdóttir er matgæðingur vikunnar.
Ég þakka Markúsi Árna fyrir áskorunina. Það er alltaf gaman að fá hann í heimsókn. Ég er með frábæra uppskrift að kjúklingarétt sem flestum ætti að líka við. Svo langaði mig að bæta við góðum fiskrétt sem hefur verið í uppáhaldi á mínu heimili í meira en 30 ár.
Kjúklingaréttur með núðlum
Hráefni:
250 gr. núðlur
Olía til steikingar
500 gr. kjúlinga- lundir / bringur
Kjúklingarkrydd eða steikarkrydd
1 laukur
1 rauð paprika
1 – 2 brokkólíhöfuð (fer eftir stærð)
6 – 8 msk. sojasósa
2 tsk. púðursykur
Aðferð:
1. Skera lauk, papriku og brokkólí.
2. Sjóða brokkólí í um það bil 5 mín., það sigtað og sett til hliðar.
3. Steikja papriku og lauk á pönnu þangað til það er mjúkt og setja það svo í skál til hliðar.
4. Skera kjúkling í bita. Hita olíu á pönnu. Skella svo kjúklingnum á og krydda hann. Þegar kjúklingurinn er tilbúinn er gott að blanda lauknum og paprikunni saman við í smá stund.
5. Meðan það er verið að steikja kjúklinginn er gott að sjóða núðlurnar samkvæmt leiðbeiningum á pakka.
6. Blanda saman sojasósu og púðursykri.
7. Þegar allt er tilbúið set ég allt saman í eldfastmót eða stóra skál og helli sojasósublöndunni við og blanda öllu rólega saman.
8. Svo er bara að njóta.
Ýsa í soyja
Hráefni:
500 gr. ýsa
Sítrónusafi
Sítrónupipar
1 – 2 bollar hveiti
1 – 2 msk. karrý
5 – 7 dl. af rjóma
Soyjasósa
Aðferð:
1. Fiskstykkjunum raðað í eldfast mót, sítrónusafa sprautað yfir og kryddað með sítrónupipar. Láta liggja í smá stund.
2. Blanda saman hveiti og karrý í skál. Fisknum er velt upp úr blöndunni og steiktur upp úr olíu/smjöri á pönnu þangað til hjúpurinn er orðinn gylltur.
3. Fisknum er svo raðað í eldfast mót. Rjóma hellt yfir þannig að hann fljóti yfir fiskinn. Slatta af soyjasósu skvekkt yfir.
4. Eldfasta mótið sett inn í ofn og bakað í ofni á 180° í 20 mín.
5. Verði ykkur að góðu.
Með fiskréttinum ber ég fram salat, hrísgrjón og soyjasósu.
Ég ætla að skora á Sigrúnu Ström að vera matgæðingur næstu viku. Ég er viss um að hún eigi góða uppskrift til að deila með okkur.
