Gunnar J. Guðmundsson er matgæðingur vikunnar.

Takk fyrir þessa krefjandi áskorun Ninja, Jórturdýrið úr Krás var hreint hnossgæti.  Ég ætla að vera meira á villtu nótunum og bjóða uppá gæsa- og andaveislu.  Þeir sem ekki stunda veiðar verða bara að troða sér í mat hjá þeim sem veiða gæs eða önd.

Í forrétt er heitreykt
gæsabringa á gasgrilli.
Aðferð:
Útbýrð pækil (100 gr salt leyst upp í 1 lítra köldu vatni) hefur gæsabringurnar 8 klst. í pæklinum í ísskáp, tekur svo bringurnar uppúr, þerrar þær aðeins með eldhúspappír þannig að þær taki betur reykinn.
Þá er að græja grillið. Ég hef keypt spæni í Ellingsen í pokum. Spænirinn er settur í álbakka og skellt beint á steinana eða kolin og kveikt undir þeim megin, skellir svo bringunum á grillið hinumegin og lætur malla í 1-2 tíma, passa að snúa reglulega. Gott er að smakka til og hafa dökkan mjöð  meðan á reykingu stendur. Skera skal í þunnar sneiðar þvert á vöðva og gott er að hafa bláberjasultu og klettasalat með.

Aðalréttur:
Hunangs- og piparlegin
önd (gæs).
Bringur
úr 1 til 2 öndum eða gæsum
Nýmalaður pipar 1-2 tsk.
Hunang 1 yfirfull tsk.
Salt ¼ tsk.
Grófmalað salt
rétt fyrir steikingu.
Rauðvín 1-2 msk.
Timían ¼ til ½ tsk.
Smjör til steikingar.

Aðferð:
Bringurnar eru teknar af skipinu, settar í glæran plastpoka.
Pipar, fínu salti og timíani stráð yfir, hunangið sett ofan í pokann ásamt rauðvíninu, pokinn nánast lofttæmdur og bundið fyrir. Hrært í pokanum í smá stund þannig að hunangið leysist upp í rauðvíninu og kryddið fari um allar bringurnar. Látið marinerast í sólarhring í ísskáp. Ágætt að leyfa bringunum að standa við stofuhita 3-4 tíma fyrir eldun. Bringurnar eru svo steiktar í 40-50 sek. á hvorri hlið við mikinn hita, nota smjör á pönnuna.  Hita pönnuna vel upp áður en þeim er skellt á.
Svo er bringunum skellt í eldfast mót smurt með smávegis af smjöri og inn í ofn við 150° í 10 mín. Gæs 13-15 mín.
Láta þær jafna sig í nokkrar mínútur áður en þær eru snæddar. Gott að nota vökvann sem verður eftir af mareningunni í villta pakkasósu.
Brúnaðar gulrætur og kartöflur ásamt góðu salati steinliggur með þessu.

Eftirréttur:
Ís að egin vali.
Njótið

Næst vil ég skora á frænda og gleðysveynabróður minn og stórskyttuna Sævar Þór Gíslason, titilhafa DRUDLUSOKKUR ÁRSINS í gleðysveyna félaginu. Sævar er eins og Ninni(ja) menntaður matfræðingur svo ekki skiptir máli hvort hann eldar jórturdýr eða klaufdýr, það bara getur ekki klikkað.