Af ástæðu sem ég fæst ekki um að velta fyrir mér hver er er látið liggja að því í frétt í Dagskránni 16. ágúst í viðtali við Svan Bjarnason umdæmisstjóra Vegagerðarinnar á Suðurlandi að um misskilning sé að ræða varðar þá ákvörðun Alþingis frá því í júní á þessu sumri að flýtt hafi verið smíði nýrrar Ölfusárbrúar við Selfoss um 3-4 ár. Glaður skal ég taka af öll tvímæli um að enginn einasti misskilningur er hér á ferðinni. Nema að orðalagið 3-4 ár hafi aðra merkingu í Vegagerðinni en annarstaðar.

Vitnum beint í frumheimildina til að hafa þetta alveg á hreinu. Í þeim breytingum á samgönguáætlun sem Alþingi gerði í sumar stendur orðrétt í 6. lið upptalningar um þær:  "Meiri hlutinn leggur til að tillögurnar verði samþykktar með breytingum sem gerð er grein fyrir á sérstökum þingskjölum. Helstu breytingar eru eftirfarandi:  6. Lagt er til að flýta framkvæmdum við gerð nýrrar brúar á Ölfusá um 3–4 ár." Var það samþykkt með 43 atkvæðum þingmanna úr öllum flokkum.

Í þetta eitt og ekkert annað var vitnað í fyrri fréttum um málið. Alþingi fer með fjárveitingar- og ákvörðunarvaldið í þessum málum  og engin annar. Það var ákvörðun Alþingis frá því fyrir tæpum tveimur mánuðum að flýta brúnni um 3-4 ár, frá 2018. Ef að hártogunin um túlkun á þessari ákvörðun þingsins snýr að því hvort brúnni verði flýtt um 3 ár eða 4 er það mjög undarleg nálgun á málinu. Það sem smíði hennar var flýtt frá 2018 til 2014 eða 2015. Um 3-4 ár. Hvort árið verður byrjað verður ákveðið á fjárlögum næstu missera. Skýrar getur það ekki verið.