Nú hefur verið blásið upp í Hveragerði loftborið æfingahýsi sem mun vonandi nýtast Hvergerðingum sem best. Æfingahýsið hefur verið mikið í fréttum undanfarið vegna uppblásturs þess enda eina slíka mannvirkið á landinu.Hefur bæjarstjóri Hveragerðisbæjar þar oftar en ekki komið í viðtöl og talað fyrir framkvæmdinni. Í hádegisfréttum ríkisútvarps 8. júlí sl. var eitt þessara viðtala við bæjarstjórann. Þar var bæjarstjórinn m.a. spurður um kostnaðinn við hýsið og svaraði hann því til að hann væri um 310 mkr. auk virðisaukaskatts og alls væri því kostnaðurinn 380 mkr. Þá má nefna að að í fréttum mbl.is þann 4. og 7. júlí sl., sem byggðu á fréttatilkynningu frá bæjarskrifstofunni, kom fram að kostnaðurinn við framkvæmdina væri 230 mkr. Í frétt á dfs.is þann 8. júlí kom svo fram enn ein talan um kostnað við hýsið og sagði þar að hann væri um 300 mkr. Mikið ósamræmi er á milli þessa talna auk þess sem þær  passa alls ekki við þá útreikninga sem framkvæmdastjóri Fasteignafélags Hveragerðisbæjar sendi bæjarfulltrúum fyrir síðasta bæjarstjórnarfund, að beiðni minnihluta A-listans. Þar kom fram að kostnaðurinn við loftborna æfingahýsið stæði nú alls í tæpum 396 mkr. Hér munar því alls 16 mkr. á tölum sem bæjarstjóri gefur upp í fjölmiðlum og 166 mkr.  á þeim tölum sem fram komu í ofangreindum fréttum á mbl.is. Hvað veldur þessu misræmi þarf bæjarstjóri að svara og leiðrétta.

Með eða án vsk.

Í gegnum alla umræðu um kostnað við loftborna æfingahýsið hefur meirihluti sjálfstæðismanna reynt að draga úr raunverulegum kostnaði við framkvæmdina. Alltaf hafa sjálfstæðismenn nefnt tölur varðandi framkvæmdina  án virðisaukaskatts, en með því sýnist kostnaðurinn vera um fjórðungi lægri en hann er í raun og veru. Leikmenn sem ekki hafa kynnt sér málið til hlítar átta sig harla á þessum talnaleik. Virðisaukaskattinn þarf Hveragerðisbær að greiða þó honum sé dreift á  20 ára tímabil eins og raunin er með hýsið.  Þetta þýðir í raun að ríkið lánar Hveragerðisbæ fyrir virðisaukaskattinum í þennan tíma. Sá  blekkingaleikur sem sjálfstæðismenn hafa beitt í þessu máli er fjarri því að vera í anda opinnar og gagnsærrar stjórnsýslu. Blekkingarleikurinn hefur meira að segja náð að slá ryki í augu fjölmiðlamanna sem vita ekki lengur hvað er rétt í þessu máli ef marka má þau dæmi sem nefnd eru hér að ofan.

Úr 230 mkr. í 396 mkr. og rúmlega

Þegar sjálfstæðismenn í Hveragerði kynntu framkvæmd um loftborið æfingahýsi fyrir bæjarbúum árið 2009 var fullyrt að framkvæmdin myndi kosta Hveragerðisbæ um 295 mkr. (230 mkr. án vsk.). Framkvæmdin hefur því farið um 100 mkr. fram yfir upphaflega kostnaðarútreikninga, eða rúmlega þriðjung. Endanlegur kostnaður verður örugglega hærri en þessar 396 mkr. sem þegar hefur verið eytt í verkefnið.  Enn á eftir að byggja búningaaðstöðu í hýsinu og upplýsingar um kostnað vegna aukaverka liggja ekki fyrir. Vísast bætast nokkrar milljónir eða jafnvel tugir milljóna við kostnaðartölurnar áður en endanlegur kostnaður liggur fyrir. Allir geta séð, hvort sem tölurnar eru með eða án virðisaukaskatts, að slík áætlanagerð stenst engar kröfur um vandaða stjórnsýslu, sem mikil krafa er uppi um að sé viðhöfð. Þetta er alvarlegt mál, sérstaklega hjá sveitarfélagi sem ekki hefur getað staðið undir afborgunum af langtímaskuldum undanfarin ár.

Njörður Sigurðsson, Hveragerði.