Handleggsbrotnaði við að setja garðsláttuvélina sína í gang
Þriðjudagur, 10. júlí 2012 16:15
11 ökumenn voru teknir í liðinni viku grunaðir um að aka undir áhrifum fíkniefna. 6 aðrir voru stöðvaðir vegna gruns um að þeir væru að aka ölvaðir. Flest málanna komu upp í tengslum við eftirlit með umferð í gegn um umdæmið að og frá útihátíð á Gaddstaðaflötum um liðna helgi en einnig á Flúðum, Selfossi og á Stokkseyri. Vegna þessarar umferðar og voru 4 aðilar handteknir, í fjórum aðskildum málum, vegna vörslu þeirra á fíkniefnum. Bæði var um að ræða maríuana og ætlað amfetamín sem fannst með aðstoð fíkniefnaleitarhunds frá Tollgæslunni en tollvörður með hund aðstoðaði lögreglu við eftirlitið.
23 voru kærðir fyrir að aka of hratt í umdæminu, einn þeirra á 144 km/klst hraða þar sem leyfður hámarkshraði er 90 km/klst. Sá lauk málinu með greiðslu á 90 þúsund króna sekt á vettvangi. Auk þess fær viðkomandi 3 punkta í ökuferilsskrá.
Umferðaróhapp varð í Hveragerði þann 2. júní s.l. þegar átta ára drengur hjólaði á hlið bifreiðar á Grænumörk. Virðist sem hann hafi lent á afturbretti hennar á nokkurri ferð. Hann var með hjálm á höfði en höggið var það mikið að hjálmurinn brotnaði. Hann var fluttur undir læknishendur en meiðslin eru ekki talin alvarleg. Afturbremsur hjólsins reyndust bilaðar þegar að var gáð.
Annar maður handleggsbrotnaði í Hveragerði. Sá var að reyna að snúa garðsláttuvél sinni í gang með því að snúa hnífnum undir henni með handafli. Vélin fór snarlega í gang og hann of seinn að kippa hendinni að sér.
4 umferðarslys voru tilkynnt til lögreglu í vikunni, öll með minniháttar meiðslum. Í tveimur tilfellum var um að ræða ökumenn bifhjóla sem misstu stjórn á hjólum sínum. Þá varð vinnuslys á sveitabæ í Skeiða- og Gnúpverjahreppi í gær þegar rúllubaggagreip sem verið var að losa af gálga dráttarvélar valt og spjót hennar rakst í mann sem stóð á því og olli honum töluverðum áverkum. Viðkomandi var fluttur með sjúkrabifreið á sjúkrahús í Reykjavík.
Í vikunni kom í ljós að brotist hefur verið inn í a.m.k. 6 sumarhús í uppsveitum Árnessýslu og á þeim og innanstokksmunum þeirra unnar verulegar skemmdir. Bifreið sem stóð við einn bústaðinn var stöðvuð af lögreglunni í Reykjavík og reyndist s.k. góðkunningi lögreglunnar á henni. Sá hefur verið úrskurðaður í gæsluvarðhald vegna rannsóknar fjölda brota. Upplýsingum um þessi mál og mannaferðir sem gætu tengst þeim má koma til lögreglu í síma 480 1010
Þetta kemur fram í dagbók lögreglunnar í Árnessýslu fyrir síðustu viku og helgina.
