Skálholtshátíð verður haldin 19. – 22. júlí 2012. Í ár verður hún með öðru sniði en áður og nær hún yfir fleiri daga. Verkefni hennar eru fleiri og margvíslegri. Fyrir liggur fjölbreytt dagskrá og er aðgengileg á vef Skálholts, http://skalholt.is/. Sönghópurinn Voces Thules syngur Þorlákstíðir og saltarasöngva frá 17. öld í Skálholtskirkju og messað verður við Þorlákssæti kl. 12 að hádegi á hinni eiginlegu Þorláksmessu að sumri, föstudaginn 20. júlí. Fræðslu- og skemmtidagskrá. Miðaldadagur fjölskyldunnar- á Skálholtshátíð verður laugardaginn 21. júlí. Boðið verður upp á stuttar göngur undir leiðsögn kunnáttufólks, m.a. skólagöngu, grasagöngu og fuglagöngu. Farið verður í leiki sem voru vel þekktir s.s. Köttur og mús, að stökkva yfir sauðarlegg og boðhlaup. Möguleiki er á að þekktar persónur miðalda skjóti upp kollinum og verður hægt að slást í för með þeim um hin fornu hlöð í Skálholti, íklædd skikkjum eða höfuðbúnaði þess tíma. Markaðstorg með lífrænum afurðum og fjölbreyttu úrvali verður alla helgina og einnig verður hægt að kaupa veitingar s.s. máltíð skólasveina, kaffihlaðborð biskupsfrúarinnar og miðaldamjöð. Á sunnudag 22. júlí verður hátíðarguðsþjónusta kl. 14.00 í Skálholtskirkju, messukaffi og dagskrá kl. 16.15

Verið velkomin í Skálholt á Skálholtshátíð 2012.