Fyrsta bók ársins hjá Bókaútgáfunni Sæmundi – útgáfuhóf

Verðlaunahöfundurinn Kim Leine mætir á útgáfuhóf í Lækjargötuhúsi á Árbæjarsafni fimmtudagskvöldið 3. janúar kl. 20. Þar er fagnað fyrstu bók Sæmundar á nýju ári, Rauður maður/Svartur maður sem Leine sendi frá sér í fyrra og birtist hér í glæsilegri þýðingu Jóns Halls Stefánssonar.

Í þessum öðrum hluta Grænlandstrílógíu sinnar leitar Kim Leine fanga aftur til 18. aldar, í nýlendustofnun Dana á Grænlandi.

Særingamaðurinn Aappaluttoq, Rauður, bjargar lífi fársjúks sonar með því að koma honum í fóstur hjá trúboðanum Hans Egede og Gertrud eiginkonu hans. Þvert gegn vilja Rauðs er drengnum aldrei skilað því maðurinn í svörtu hempunni ákveður að skíra drenginn og halda honum hjá sér.

Hér er sagt frá upphafi kristniboðs og nýlenduvæðingar á Grænlandi, lygilegum tildrögum, ævintýralegri framkvæmd og hræðilegum afleiðingum, bæði fyrir nýlendubúana dönsku og Grænlendinga sjálfa. Stílsnilld Leine er söm við sig, atburðarásin og lýsingarnar eru hér ennþá magnaðri en í fyrstu sögulegu skáldsögu hans, Spámönnunum í Botnleysufirði. Hér fer höfundurinn þó nær skjalfestum veruleika því flestar hinna fjölmörgu eftirminnilegu persóna eiga sér sögulegar fyrirmyndir og atburðirnir sem eru hvað ótrúlegastir áttu sér stað í raun og veru.

Rauður maður/Svartur maður er stórvirki í öllum skilningi, saga um árekstur ólíkra menningarheima og baráttu við hrikaleg náttúruöfl, saga um feður og syni, dauða og drykkjuskap, sturlun og stærilæti, guðstrú og glötun, uppgjöf og uppljómun sálarinnar.

 

DEILA